702

Cerîdesi tutulacak ve işbu zabt cerîdelerinin her varakası numrolı ve meclis mührüyle memhûr olması lâzım gelecektir.

Doksan yedinci madde
Her madde hakkında tahkîkât ve müzâkerât ve tarafından ibrâz olunan evrâk hulâsasıyla evvelkinin târîhi ve tedkîkâta mebde’ olan varakanın numrosu ve mevcûd a’zânın esâmîsi evvel emirde bir varakaya zabt ve baş kâtib tarafından temyîz ve tashîh olunup meclisçe kırâat ve kabûl olunduğu hâlde nihâyet yirmi dört sâat zarfında cerîde-i mahsûsasına aynıyla derc olunarak zîri reîs ve esnâ-yı muhâkemede hâzır bulunan a’zâ ve baş kâtib tarafından imzâ olunacaktır.

Doksan sekizinci madde
Bir kararın mazbatası tanzîm olunduktan soñra ol karâra müteallik mahkemede kalması lâzım gelen evrâk baş kâtib ma’rifetiyle hıfz edilecektir.

Doksan dokuzuncu madde
Zabt varakalarıyla yapılacak mazbatalara esâs ittihâz olunacak ve her mazbatanın metninde jurnâl ve arzuhâlin târîh ve numro ve meâli ve tarafeynin isim ve şöhret ve mahal-i ikâmet ve tâbiiyet ve san’at ve sıfatlarıyla tahkîkât-ı vâkıanın ve da’vânın hulâsası ve esbâb-ı kânûniyesiyle verilen hüküm ve karâr derc ve beyân kılınacaktır.

Yüzüncü madde
Mazbata müsveddesi kaleme alındıktan soñra baş kâtibe i’tâ olunacak ve baş kâtib meclisde kırâatle kabûl olunduğu hâlde meclis reîsiyle berâber imzâ ederek tebyîz olunmak üzere kaleme verecektir.

Yüz birinci madde
Mazbatalar tebyîz ve reîs ve a’zâ tarafından temhîr olunduktan soñra mevki’-i icrâya verilecek ve müsveddeler hıfz olunmak üzere cem’ olunarak her ayınki ayrıca teclîd olunacaktır.

Şûrâ