713

Yirmi Beşinci Madde: Şûrâ-yı Devlete havale olunan evrakın dairelere taksim ve itası Şûrâ-yı Devlet Baş Kâtibinin vazifesidir.

Yirmi Altıncı Madde: Dairelere havale olunan evrak için her dairede biri mesalih-i âdiye ve diğeri mesalih-i mühimmeye mahsus olmak üzere (ruznâme-i müzakere) namıyla iki kayıd defteri tutulur.

Yirmi Yedinci Madde: Her dairede müzakereye konulacak mevaddın kabl’el-müzakere hulâsa edilmesini aza ve muavinlerden birine havale etmek reis-i sâninin vazifesidir. Ve mesalihin bu vechle hulâsa ve mütalâa olunmasını reis-i evvel dahi aza ve muavinlerden tensib edeceği bir zata emr edebilir.

Yirmi Sekizinci Madde: Dairelerde hulâsa olunmak için aza veyahut muavinlere havale olunan evrakın tarih ve envaını mübeyyin fihrist suretinde bir defter tutulup işbu defter dairenin müzakerata şurûunda reis-i sâninin nezdinde bulunur.

Yirmi Dokuzuncu Madde: Reis-i sâniler ile aza müzakere edip muavinler mesalihi hulâsa etmeğe ve mülazımlar dahi müsveddelerini kaleme almağa memurdurlar. Her dairenin muavin ve mülazımları Şûrâ-yı Devlet Baş Kâtibinin rey ve nezareti altındadır.

Otuzuncu Madde: Dairelerde mesalihin kararları ekseriyet-i ârâ ile verilip reis ve azanın mütesaviyen birer reyleri vardır. Ve Muhakemat Dairesinin umur-ı cezaiyeye müteallik olan kararları yedinci maddenin hükmüne tevfikan ittihad-ı ârâ ile cereyan etmek meşruttur.

Otuz Birinci Madde: Şûrâ-yı Devletin nizamnâme-i aslîsi mucibince her dairede bir maslahatın müzakeresi ve kararı azanın nısfından ziyadesinin vücud ve huzuruna mevkufdur.

Otuz İkinci Madde: Bir daireye muhavel mesalihden bi’l-etraf müzakeresi lâzım gelenler için komisyon teşkil olunup işbu komisyonda maslahatın asıl müteallik olduğu daireden mürsel azanın biri riyaset eder. Ve iki dairenin içtimaıyla müzakeresi lâzım gelen bir maddenin hîn-i tetkikinde iki daire reis-i sânilerinden birisi makam-ı riyasetden reis tayin olunur.

L