719

( Taşra Meclisleri azalarının yekdiğere )
( takaddümleri hakkında nizam )

Taşra meclislerinde milel-i gayr-i müslime rüesa-yı ruhaniyesiyle efradından aza bulunanların yekdiğere takaddümleri her yerde bir başka tarzda cereyan etmekde ve bu ıttırad ve intizamsızlıktan dolayı kîl ü kâl ve şikâyet vukuunun ardı kesilmemekte olmasıyla şu halin def’ ve ıslahı zımnında vaz’ı lazım gelen bazı kavaid-i teşrifatiyenin beyanına ibtidar olunur.

Birinci madde — Rüesa-yı mumaileyhimin ba-berat-ı âli haiz oldukları rütbe-i mahsusa-yı ruhaniye iktizasınca meratib-i teşrifatiyeye nail olmaları lazım geleceğinden evvela metropolid yani baş piskoposlar hükkâm-ı şer’in akabinde bulunacak müfti efendilerden ve yalnız piskopos bulunanlar mal müdürlerinden sonra bulunacaklardır.

İkinci madde — Başka başka mezheblere müteallik olup bir mahalde bulunan rüesa-yı ruhaniye cümleten bir rütbede bulundukları halde beratlarının tarihi itibariyle kıdemlerine göre birbirine takaddüm edip fakat Rum kilisesi rüesa-yı ruhaniyesine min-el-kadim verilmiş olan imtiyaz-ı mahsus iktizasınca Rum metropolid veyahut piskoposları hem-rütbeleri olan sair rüesa-yı ruhaniyeye takaddüm edeceklerdir.

Üçüncü madde — Aza-yı saireden zî-rütbe olanların yekdiğere takaddümleri kezalik rütbeleri tertibiyle olması usul-i teşrifatiye iktizasından olduğu gibi bunlardan gerek hem-rütbe olan ve gerek rütbesiz bulunan müslim ve gayr-i müslim azanın kâffesi dahi memur oldukları meclise devamları tarihinin kıdemi itibariyle ikamet eyleyeceklerdir.

Dördüncü madde — Ber-vech-i bala zikr olunan usul-i teşrifatiyenin mücerred imtiyaz-ı mahsusa ve rütbe ve kıdem kaidesine müstenid olması cihetle tağyir ve ihlaline başka türlü vesile sebeb addolunmayacaktır.