73

* 368 Madde: Bey’-i fuzûlî ve bey’-i merhûn gibi gayrın hakkı taalluk eden bey’, evvel gayrın iznine mevkûfan mün’akid olur.

( Fasl-ı Sâni )
( Envâ’-ı buyû’un ahkâmı beyânındadır )

369 Madde: Bey’-i mün’akidin hükmü mülkiyetdir.
Ya’ni müşterinin mebî’a ve bayi’in semene mâlik olmasıdır.

370 Madde: Bey’-i bâtıl aslen hükmü ifâde etmez.
Binâenaleyh bey’-i bâtılla müşteri bayi’in izniyle mebî’i kabz ettikde mebî’ müşteri ‘indinde emânet kabîlinden olarak bilâ-taaddî telef olsa müşteriye zamân lâzım gelmez.

371 Madde: Bey’-i fâsid ‘inde’l-kabz hükmü ifâde eder.
Ya’ni müşteri bayi’in izniyle mebî’i kabz ettikde aña mâlik olur.
Binâenaleyh bey’-i fâsid ile iştirâ olunan mebî’ müşteri ‘indinde telef olsa zamân lâzım gelir.
Şöyle ki misliyâtdan ise mislini ve kıymiyâtdan ise yevm-i kabzındaki kıymetini müşterinin bayi’e vermesi lâzım olur.

372 Madde: Bey’-i fâsidde âkidînden her birinin bey’i feshetmeğe hakkı vardır.
Fakat mebî’ eğer müşteri yedinde telef olur ise yâhud müşteri anı istihlâk veyâ dîgere bey’-i sahîh ile bey’ yâ hibe gibi bir sûretle elinden çıkarır ise veyâhud mebî’ hâne olub da ta’mîr olunmak veyâ arsa olub da ağaç dikilmek gibi bir sûretle müşteri tarafından mebî’a bir şey ilâve veyâhud buğday olub da tahn ile un edilmek gibi mebî’in ismi değişecek sûretle tağyîr edilir ise hakk-ı fesih kalmaz.

373 Madde: Bey’-i fâsid fesih olundukda eğer kabz-ı semen olunmuş ise bayi’ semeni red edinceye dek müşterinin mebî’i habs etmek hakkı vardır.

374 Madde: Bey’-i nâfiz fi’l-hâl hükmü ifâde eder.

375 Madde: Bey’-i nâfiz-i lâzımda mütebâyiândan hîç birisi dönemez.

376 Madde: Bey’-i gayr-ı lâzımda muhayyer olan kimse bey’i fesih edebilir.

L
10