730

Bir mazbata yapılıp makâm-ı vâlâ-yı sadâret-i uzmâdan hâkpây-ı şevket-ihtivâ-yı hazret-i şehinşâhîye arz ve takdîm ile muvâfık-ı emr ü fermân-ı maâlî-nişân-ı cenâb-ı mülûkâne buyurulduğu hâlde nişân-ı hümâyûn kalemi tarafından iktizâsı icrâ olunacaktır.

Yirmi yedinci bend: İşbu nişân-ı âlînin birinci rütbesi içün meclis ma‘rifetiyle iki bin beş yüz guruş ve ikincisi içün bin beş yüz guruş ve üçüncüsü içün yedi yüz elli guruş ve dördüncüsü içün beş yüz guruş ve beşinci rütbe içün iki yüz elli guruş berât harcı alınacaktır. Ve askerîden nâil olacaklar hakkında îcâbına göre bu harcın afvı mutlakâ irâde-i seniyye-i hazret-i mülûkâneye menût olacaktır. Ve ecnebiye inâyet buyurulan nişân-ı âlîler berât harcından muâf tutulacaktır ve masârif-i kalemiyyesine mukâbil olmak üzere ancak berât harçları hazîne-i celîleye teslîm olunacaktır.

Yirmi sekizinci bend: İşbu nişân-ı âlî ihsân buyurulanlar tarafından Dersaâdet’de ise meclis ma‘rifetiyle nişânın ahzını müş‘ir bir makbûz senedi ahz olunup ve nişâna nâil olan taşrada olduğu hâlde zâbiti vâsıtasıyla kezâlik elinden sened alınarak meclisin reîsi cânibine gönderilip meclisçe hıfz olunacaktır. Ve hall vukû‘unda nişân-ı mezkûr meclise teslîm olunduğu gibi alınmış olan sened redd olunacaktır. Ve işbu nişân-ı âlînin bir rütbesinden diğerine irtikâ edenler dahi yeni nişânı ahz ettikleri gibi aldıkları rütbenin mâdûnunda olarak kendilerinde bulunan rütbenin nişânını meclise redd ve iâde eyleyeceklerdir.

Târîh-i kayd fî Zâ 13 sene 1268