741

Tarafından dahi hediye ve akçe taleb edilmeyerek mahalle ve karyelisi tarafından iâne
ile izdivâcı icrâ olunacakdır ve bunda mehr-i müeccel otuz guruşdan nihâyet
yüz guruşı tecâvüz etmeyecekdir ve buña kıyâsen bir mikdâr mehr-i muaccel takdîr olunmasında
dahi be’s yokdur bâlâda beyân olunan ahvâl ve muâmelâtdan maksad-ı aslî emr-i
izdivâce ve teksîr-i tenâsüle mâni‘ olan bir takım telefât ve isrâfât-ı nâ-meşrû‘anın
lagv ve ibtâliyle sülâle-i milletin teksîr ve tevfîri kaziyyesine müstenid bulunmuş olduğundan
bu karâra tevfîk-i hareket etmeyenler şu maksadın husûlünü istememiş olacağı cihetle
o makûleler hakkında muâmele-i tevbîhiye ve îcâbına göre ahkâm-ı cezâiye icrâsı mukarrer
bulunmağın aña göre cümle tarafından devâm ve icrâsına el birliğiyle gayret edilmesi
ve zükûr ve inâsdan hîç kimsenin izdivâcına adem-i iktidâr ‘uzr olmayacağından
herkesin hâline göre emr-i izdivâc ve tenâkühün teshîline ve on yedi on sekiz yaşından
ziyâde bâkire kızların hîç bir yerde bırakılmayıp velîleri ve karye ve mahallelisi ma‘rifetleriyle
münâsib kimselere tezvîci vesâilinin istihsâline gayret ve dikkat olunması cümlenin
hamiyet ve gayretinden me’mûl ve muntazır olduğu beyâniyle i‘lân-ı keyfiyete ibtidâr kılındı