748

Cedideye vaz olunacak tamga başka ve mikyasatın beherisine muayenesiçün
urulacak tamga başka olacakdır ve bunun birincisine tatbik-i asli tamgası
ve ikincisine muayene tamgası tesmiye olunacakdır.

Yedinci Madde
Evzan memuru dairesinde bulunan meyar ve tamgalar evzan memurinin
taht-ı muhafaza ve mesuliyetinde ve hükümet-i mahalliyenin dahi nezareti altında bulunacakdır.

Sekizinci Madde
Evzan memurlarının ve muavinlerinin mikdar-ı maaşları dahiliye
nezareti tarafından tayin olunacakdır. Evzan memurlarının dairesi dahilinde
teftiş içün vuku bulacak masarif-i devriye ve kırtasiye ile tatbik
ve muayene-i evzana müteallik alatın hüsn-i muhafaza ve nakli masarifi başkaca ita
olunacak ve işbu masarif-i devriyenin icabına göre maaş-ı muhassaslarına
ilavesi dahi caiz olacakdır. Meyarlar hükümet-i mahalliye tarafından tayin
olunacak mahalde hıfz olunacak ve ameliyat dahi orada icra edilecekdir.
Evzan memurlarının daire-i memuriyetleri haricinde fevkalade olarak azimetleri
vuku bulur ise masarifi başkaca tesviye edilecekdir.

Dokuzuncu Madde
Dersaadet ve bilad-ı selasede mikyasat-ı cedidenin tatbik
ve muayenesi ve iktiza eden evzan memurlarının intihab ve nasbı şehremanetine
aid olacakdır. İdare-i zabtiyeye merbut sair liva ve kazalara memur tayini
ve muamelat-ı umumiyesi vilayat-ı saireye tevfikan zabtiye müşiriyet-i celilesi
tarafından icra kılınır.

( Fasl-ı Sani )

( Mikyasat-ı cedidenin tatbik ve muayenesine dairdir )

Onuncu Madde
Yeniden imal olunmuş olan evzan ve ekyalin muamelat-ı ahz
ve itada istimal olunmazdan evvel muayene ve tatbik edilüp tamga vaz
olunmak üzere evzan memuru dairesine ibraz olunacakdır. Nev ve şekli
taraf-ı devletden kabul ve tasdik olunmamış olan mevazin tamgaya kabul olunmayacakdır.
Evzan memurları tarafından tamgalanmamış olan mikyasat hiç bir mahalde satılmayacağı
gibi muamelat içün dahi istimal edilemeyecekdir.

On Birinci Madde
Müttehaz olan usul-i aşariye mucibince muayyen olan
isimleri gayet açık ve sarih olarak mikyasatın üzerine yazılmış olacakdır.

Bu ka