280

( Usûl-i Muhâkeme-i Ticârete Dâir Nizâmnâmedir )
( Sûret-i Hatt-ı Hümâyûn )
( Mûcibince amel oluna )
( Bâb-ı Evvel )
( Davânın sûret-i bed’ ve rü'yet ve faslı beyânındadır )
( Fasl-ı Evvel )
( İstid'âlara dâirdir )

Birinci Madde — Her bir istid'â varaka-i sahîha üzerine muharrer arzuhâl ile beyân olunur.

İkinci Madde — Arzuhâlde yevm ve şehr ve sene târîhleri ve müddeî ve müddeî aleyhin ism ve şöhret ve san'atları ve ikâmetgâhları ve müddeî veyâ müddeî aleyh tebaa-i devlet-i aliyeden olmadıkları hâlde kangı devlet tebeasından bulundukları ve müddeâ ile hulâsa-i edillesi ve davânın kangı mahkeme-i ticâretde rü'yet olunması husûsları tahrîr kılınmak ve arzuhâl dahi sâhibi tarafından imzâ veyâ temhîr olunmak lâzımdır. Husûsât-ı meşrûhayı câmi' olmayan arzuhâl makbûl değildir.

Üçüncü Madde — Davânın kangı ticâret mahkemesinde rü'yet olunması iktizâ edeceği mâddesi ber-vech-i âtî ta'yîn ve beyân olunur.
Evvelâ müddeî davâsını müddeî aleyhin ikâmetgâhı ve olduğu hâlde muvakkaten bulunduğu veyâhûd menşe-i iddiâ olan eşyânın taahhüd ve tesellüm olunduğu veyâ akçenin te'diye olunacağı mahaller mahkemelerinden her kangısında murâd eder ise fasl ve rü'yet ettirmeğe muktedir olur ( * )
Sâniyen şirket-i husûsiyeden mâadâ her bir şirket a'zâsından veyâhûd hâricden bir şahs-ı âhar tarafından şirket aleyhine olunan davâ ol şirket bâkî oldukça merkezi mahkeme-i ticâretinde ve eğer şirket münfesih olup da muhâsebesi kat' olunmuş ise şürekâdan müddeî aleyh olan kimsenin ikâmetgâhı ticâret mahkemesinde fasl ve rü'yet kılınır.

______________________
( * ) Müddeî aleyh müteaddid olduğu hâlde müddeî bunların başlıcalarından birinin ikâmetgâhı mahkeme-i ticâretinde rü'yet edebilir.

Sâlisen