781

Sâlisen: Bir şahs-ı müteveffânın ashâb-ı matlûbu tarafından vukû’bulan da’vâ müteveffânın terekesi henüz taksîm olunmamış olduğu hâlde tereke kangı mahalde taksîm olunur ise oranın mahkeme-i ticâretinde ve taksîm olunmuş bulunduğu takdîrde müdde’î-aleyh olan veresenin ikâmetgâhlarının mensûb olduğu ticâret mahkemelerinde rü’yet kılınır.

Râbian: İflâsa müteallik da’vâ şahs-ı müflisin ikâmetgâhı mahkeme-i ticâretinde rü’yet olunur (*)

Hâmisen: Bir da’vânın rü’yeti esnâsında ol da’vâya müteallik olarak taahhüd ve kefâlet maddelerinden dolayı dîger bir da’vâ hudûs eder ise da’vâ-yı hâdise da’vâ-yı asliyenin rü’yet olunduğu mahkeme-i ticârete havâle olunur fakat da’vâ-yı asliyenin mücerred da’vâ-yı hâdisede müdde’î-aleyh olan kimesneyi kendi mahalli mahkemesinden başka bir mahkemeye ihzâr murâdıyla tasnî’ olunmuş olduğu hâlen veyâ ba’zı evrâk ve senedât delâletiyle sâbit olur ise o hâlde taahhüd ve kefâlet da’vâsında müdde’î-aleyh bulunan şahsın ihzâr olunduğu mahkemeden nakl-i da’vâya hak ve salâhiyeti vardır.

Dördüncü Madde: Dersaâdet’de Ticâret Nezâret-i Celîlesi cânibinden ve taşralarda en büyük mahallî me’mûru taraflarından havâle olunmadıkça ticâret mahkemelerinde arzuhal kabûl olunmayacaktır.

Beşinci Madde: Arzuhalin havâle kılındığı akabinde hâvî olduğu da’vâ içün mahsûs bir mübâşir ta’yîn olunup me’mûriyetini mübeyyin yedine bir pusula verilecektir.

( İkinci Fasıl )

( Tarafeynin sûret-i celb ve ihzârı beyânındadır )

Altıncı Madde: Tarafeynin bir yevm-i muayyende mahkemeye celb ve ihzârları arzuhallerin defterlere kayıdları târîhi sırasınca icrâ olunur fakat müsta’cel olan da’vâlar müstesnâdır.

________________________
(*) İflâsa müteallik da’vâ iflâsdan tevellüd etmiş ve iflâs esnâsında vâki’ olmuş ve hudûsu ancak iflâs vukû’una mütevakkıf bulunmuş olan münâzaâtder.