785

Bir mahalde mukim ise ihzar pusulası bilâ-te'hir kendisine tebliğ ve ita olunmak üzere reis-i mahkeme tarafından tahrir olunacak mektuba leffen ol mahallin büyük memuruna irsal olunur ve bu mektubu mübaşir posta kalemine götürerek teslimini müş'ir bir kıt'a müverrah ve memhur ilmühaber alıp getirecektir.

Sâdisen: İhzar olunacak şahs memalik-i ecnebiyede mukim olduğu halde ihzar pusulası serîan ikametgâhına isal olunmak üzere kezalik reis-i mahkemenin bir kıt'a tahriratına leffen Umur-ı Hariciye Nezareti'ne irsal olunacaktır.

( Üçüncü Fasıl )

( Ticaret mahkemelerinde muhakemâtın alenî olması ve umur-ı zabıtanın )
( Suret-i icrası beyanındadır )

Yirmi birinci madde: Mahâkim-i ticarette ve divan-ı istinafta mürafaât alenen icra olunur fakat alenî muhakeme takdirinde mucib-i âr ve hacâlet olacak bir şey olduğu veyahut sâirgûne bir mahzur-ı kavî bulunduğu halde ba'dehû sebeb ve illeti Ticaret Nezareti'ne beyan olunmak şartıyla mürafaanın alenî olmayarak icrasına meclisçe bittezekkür karar verilebilir.

Yirmi ikinci madde: Esnâ-yı muhakemâtda meclis odalarının umur-ı zabıtası reis bulunan zâta muhavveldir.

Yirmi üçüncü madde: Meclisde istimâ-i muhakemât için hariçden bulunacak kimseler levâzım-ı edebe riayetle sükût üzere duracak ve nizamın vikayesiçün reis tarafından her ne emr olunur ise derhal tamamıyla icra kılınacaktır.

Yirmi dördüncü madde: Esnâ-yı mürafaada her kim olur ise olsun sükût etmez veyahut tarafeynin ifadelerini ve a'zânın kelâmları ve gerek reisin emr ve tenbihi ve mahkemenin hükm ve kararı hakkında tahsin veyahut takbihi mutazammın bir gûne işaret ve hareket eder veyahut her nasıl ise gürültü vukuuna sebeb olur da reis tarafından olunacak emr ve tenbihe itaat etmez ise kalkıp gitmelerine emr olunarak inkıyad etmediği halde der-akab ahz ve girift olunup keyfiyet...