800

( Dokuzuncu Fasıl )
( İstinaf şerâiti hakkındadır )

Toksan dördüncü madde: İstinafdan murad zeyl-i kanun-ı ticaretin otuz altıncı maddesi mucibince derece-i ûlâda mehakim-i ticarette rü’yet ve fasl olunan bir davanın hüküm ve kararında bir haksızlık vuku bulmuş ise ol hüküm ve kararı ıslah etmektir.

Toksan beşinci madde: Zeyl-i kanun-ı ticaretin otuz altıncı maddesinin tayin ettiği had dahilinde olarak ticaret mahkemelerinin kat’iyen hükmettikleri davalar müddei ve müddei aleyh tarafından bil-muvafaka istida olunsa dahi istinaf olunamaz. Hatta verilmiş olan ilamda davanın hüküm ve kararı suret-i kat’iyede olduğu beyan olunmasa veyahut istinaf olunabilmesi her nasılsa tasrih kılınmış bulunsa bile davay-ı mezkûre yine kabil-i istinaf olamaz.

Toksan altıncı madde: Bilakis bir mahkeme-i ticaret bir davanın yalnız derece-i ûlâda hükmüne mezun iken bu dereceyi tecavüz ile ilamında suret-i kat’iyede hükmolunduğunu beyan etse bile ol mahkemenin hüküm ve kararı kabil-i istinaf olur.

Toksan yedinci madde: Bir mahkeme-i ticaret kendisine havale olunan davanın rü’yeti kendi vezaifi dahilinde olup olmadığı hakkında verdiği hüküm ve karar kezalik kabil-i istinaf olacaktır. Fakat bahsolunan vezaif maddesi davanın mahkeme-i ticaretten diğer bir mahkeme-i ticarete nakli hususuna dair bulunduğu halde zeyl-i kanun-ı ticaretin otuz sekizinci maddesi ahkamına tevfikan hareket olunması lazım gelir.

Toksan sekizinci madde: Akçe mikdarı gayr-i muayyen olan iddia üzerine terettüb eden hüküm ve karar dahi kabil-i istinaf olacaktır. Gayr-i muayyen denilen iddia gerek hadd-i zatında takdir-i kıymeti mümkün olamayan yakhud mümkün olup da tarafından takdir-i kıymet kılınmayan müddeadan ibarettir. Ve takdir-i kıymet maddesi müddeinin istidasında yakhud hin-i muhakemede tarafeynin vaki olacak ifadelerinde beyan olunur.

Toksan dokuzuncu madde: Davanın hüküm ve kararı hakkında olunacak istinaf
*müddei*