808

Yüz yirmi beşinci madde: İade-i muhakeme müddeti mevkiine göre istinaf için yüzüncü ve yüz birinci maddelerde tayin olunan müddet kadar olup iade-i muhakeme istidası işbu müddet-i muayyene zarfında takdim olunmak lazımdır.

Yüz yirmi altıncı madde: Mevadd-ı âtiyede münderiç olan hususattan maada iade-i muhakeme istidasının müddeti lahık olan hüküm tarafeyn müvacehesinde vaki olmuş ise ilamın bizzat tarafına veyahut ikametgahlarına tebliği tarihinden ve gıyaben vuku bulmuş ise itiraz ale’l-hükm için tayin olunan müddetin inkızasından itibar olunacaktır.

Yüz yirmi yedinci madde: Mahakimde nizamen vasi veyahut vekilleri bulunmamış olan yetimler hakkında müddet-i mezkûre verilen ilamın hadd-i büluğa erdikten sonra kendilerine bizzat veyahut ikametgahlarına icra olunacak tebliği tarihinden hesap olunacaktır.

Yüz yirmi sekizinci madde: İbraz olunan senedatın sahte olduğu veyahut sahib-i istidanın hasmı tarafından hile vukua geldiği veyahut mektum olup hîn-i muhakemede ibraz olunamayan bazı evrakın muahharen ele geçirilmesi hususları iade-i muhakemeye sebep olmuş ise ol halde li-ecli’l-istida tayin olunan müddet evvel senedatın sahteliği veyahut hasmın hilesi tahakkuk ettiği veyahut evrak-ı mektumenin ele geçirildiği günden itibar olunacaktır. Fakat yevm-i mezkûrun ihticaca salih evrak ile ispat olunması lazımedendir.

Yüz yirmi dokuzuncu madde: İade-i muhakeme istidası iki ilamın birbirine mübayin olmasından naşi vaki olduğu halde müddet-i mezkûre muahhar olan ilamın tebliği tarihinden hesap olunur.

Yüz otuzuncu madde: Mahkûm olan tarafın vefatı vukuunda iade-i muhakeme müddeti istinaf-ı dava için balada muharrer yüz üçüncü maddede beyan olunduğu vechile tevkif olunup müddet-i bakiye müteveffanın veresesine hükmün tebliği tarihinden itibar olunacaktır.

Yüz otuz birinci madde: İade-i muhakeme için tayin olunan müddet bu kere munkaziye olduktan sonra artık mahkûmun takdim-i istidaya hakkı olamaz. Ancak iade-i muhakeme