81

415 Madde - Ecr-i müsemmâ, hîn-i akdde zikr ve ta’yîn olunan ecirdir.

416 Madde - Zamân, bir şeyin misliyyâtdan ise mislini ve kıymiyyâtdan ise kıymetini vermektir.

417 Madde - Muadd li’l-istiğlâl, kiraya verilmek üzere i’dâd ve ta’yîn olunmuş şeydir ki fi’l-asl kiraya verilmek üzere yapılmış ya alınmış hân ve hâne ve hamam ve dükkân gibi akarlar ile kira arabası ve kira bârgîri misillü şeylerdir.
Ve bir şeyin ale’t-tevâlî üç sene îcâr olunması muadd li’l-istiğlâl olduğuna delîldir.
Ve bir kimse nefsiçün yapdırmış olduğu bir şeyin muadd li’l-istiğlâl olduğunu nâsa ihbâr ve i’lâm ile muadd li’l-istiğlâl olur.

418 Madde - Müstarzi’, ücret ile süd ana tutan kimsedir.

419 Madde - Muhâye’e, taksîm-i menâfi’den ibâretdir.
Meselâ bir hânede müşterek olan iki kimse bir sene biri ve dîger sene dîgeri münâvebeten intifâ’ etmek üzere karar vermek gibi.

( Bâb-ı Evvel )
( Zavâbıt-ı umûmiye beyânındadır )

420 Madde - İcârede ma’kûdün aleyh menfa’atdir.

421 Madde - Ma’kûdün aleyh i’tibâriyle icâre iki nev’dir.
Nev’-i evvel, menâfi’-i a’yân üzerine vârid olan akd-i icâre olub îcâr olunan şeye ayn-ı me’cûr ve ayn-ı müste’cer dahi denilür ve işbu nev’-i evvel üç kısma taksîm olunur.
Kısm-ı evvel, icâre-i akardır; hâne ve arâzî îcârı gibi.
Kısm-ı sânî, icâre-i urûzdur; elbise ve evânî îcârı gibi.
Kısm-ı sâlis, icâre-i hayvândır.
Nev’-i sânî, amel üzerine vârid olan akd-i icâre olub bunda me’cûra ecîr denilür; ücretle amele ve hademe tutmak gibi.
Hıref ve sanâyi’ ashâbını istîcâr etmek dahi bu kabîldendir ki meselâ kumaş derziden olmak üzere elbise kestirmek istisnâ’ olduğu gibi derziye

11
L