82

Kumaş verüb de elbise dikdirmek dahi amel üzerine icâre demekdir.....
422 Madde Ecir iki kısımdır
Kısm-ı evvel ecir-i hâsdır ki yalnız müste’cire işlemek üzere tutulan ecirdir
Aylıklı hizmetkâr gibi
Kısm-ı sânî ecir-i müşterekdir ki müste’cirden başkasına işlememek şartıyla
mukayyed olmayan ecirdir
Meselâ hammâl ve dellâl ve terzi ve sâatçi ve kuyumcı ve iskele kayıkcısı
ve kirâ arabacısı ve karye çobanı hep ecir-i müşterekdir ki bir şahsa
mahsûs olmayub herkes içün işleyebilürler fakat bunlardan biri filân
vakte kadar yalnız müste’cire işlemek üzere istîcâr olundukda ol müddet
zarfında ecir-i hâs olur kezâlik bir hammâl yâhud arabacı yâ kayıkcı filân
mahalle kadar başkasına işlemeyüb müste’cire mahsûs olmak üzere istîcâr
olundukda oraya varıncaya kadar ecir-i hâs olur
423 Madde Ecir-i hâsın müste’ciri bir şahs olduğu gibi şahs-ı
vâhid hükmünde olan müteaddid şahıslar dahi olabilür
Binâenaleyh bir karye ahâlîsi kendülerine mahsûs olmak üzere akd-i
vâhid ile bir çoban istîcâr etdiklerinde ol çoban ecir-i hâs olur
ammâ kendülerinden başkasının hayvanını dahi ra‘y eylemesini tecvîz etdikleri
sûretde ol çoban ecir-i müşterek olur
424 Madde Ecir-i müşterekin ücrete istihkâkı amel iledir
425 Madde Ecir-i hâsın ücrete istihkâkı müddet-i icârede amel içün
hâzır bulunmasiyle dir yoksa bilfiil işlemesi şart değildir
fakat amelden imtinâ‘ edemez ve ederse ücrete müstehak olmaz
426 Madde Akd-i icâre ile menfaat-i muayyeneye müstehak olan kimse
aynen ol menfaati yâ mislini yâhud mâdûnunu istîfâ edebilür
ammâ mâfevkine tecâvüz edemez
Meselâ demircilik işlemek üzere istîcâr olunan dükkânda müste’cir
mazarratda demirciliğe müsâvî yâhud ondan ehven bir san‘atı icrâ edebilür
ve bir kimse