84

Meselâ biri îcâr ideceğim deyüp diğeri istîcâr etdim yâhud biri îcâr
et deyüp diğeri îcâr etdim dese iki sûretde dahi icâre mün'akid olmaz
436 Mâdde İcâre müşâfehe ile olduğu gibi mükâtebe ile ve dilsizin
işâret-i ma'rûfesiyle dahi mün'akid olur
437 Mâdde Ta'âtî tarîkiyle dahi icâre mün'akid olur
Nitekim şifâhen pâzârlık olunmaksızın yolcu vapuruna ve iskele kayığına
ve kirâ bârgîrine binmek gibi ki ücret ma'lûm ise o kadar ve değil ise ecr-i
misl i'tâsı lâzım gelir
438 Mâdde İcârede sükût rızâ ve kabûl 'add olunur
Meselâ bir âdem şehriye elli guruş kirâ ile bir dükkân istîcâr edip de
bir kaç ay sâkin oldukdan sonra ay başında âcir eğer altmış guruşa
râzı olur isen otur olmaz isen dükkânı bırak dedikde müste'cir âtî
red ile altmış guruşa râzı olmam dedikden sonra dükkânda müstemirren otursa
kemâ fi's-sâbık elli guruş kirâ lâzım olur
ve eğer bir şey demeyip ve dükkândan çıkmayıp da müstemirren oturmuş ise şehriye
altmış guruş vermesi lâzım gelir
Kezâlik dükkân sâhibi yüz guruşa ve müste'cir seksen guruşa dese
ve sâhibi müste'ciri bırakıp o dahi dükkânda sâkin olsa seksen
guruş ücret lâzım olur
ve eğer tarafeyn sözlerinde ısrâr eyledikleri hâlde müste'cir sâkin olursa ise
ecr-i misl lâzım gelir
439 Mâdde Ba'de'l-'akd bedelin tebdîl ve yâ tezyîd ve yâ tenzîli ile tekrâr
pâzârlık olundukda 'akd-i sânî mu'teberdir
440 Mâdde İcâre-i muzâfe sahîh ve vakti hulûlünden evvel lâzım olur
Binâenaleyh ehad-i 'âkideyn mücerred vakti geldi deyü icâreyi fesh edemez
441 Mâdde İcâre sahîh olarak mün'akid oldukdan sonra başkası
ücretine ne kadar zam etse âcir mücerred bunun içün icâreyi fesh edemez
fakat vasî yâ mütevellî yetimin yâ vakfın 'akârını ecr-i mislinden noksân ile
îcâr etse icâre fâsid olup ecr-i mislin ikmâli lâzım gelir

442