87

Fakat ba‘de’l-in‘ikâd âcir yâ müste’cirin tecennün etmesiyle icâre münfesih olmaz.

459 Madde İcâre-i bâtılada isti‘mâl ile ücret lâzım olmaz.
Fakat mâl-ı vakıf ve yâ mâl-ı yetîm ise isti‘mâl ile ecr-i misil lâzım olur.
Mecnûn dahi yetîm hükmündedir.

460 Madde İn‘ikâd-ı icârenin şartları bulunup da şerâit-i sıhhatten
birisi bulunmasa icâre fâsid olur.

461 Madde İcâre-i fâside nâfizdir.
Fakat icâre-i fâsidede âcir olan kimse ecr-i misle mâlik olup ecr-i müsemmâya
mâlik olmaz.

462 Madde İcârenin fesâdı ba‘zan bedelin mechûl olmasından ve ba‘zan
dîger şerâit-i sıhhatin bulunmamasından neş’et eder.
Evvelki sûretde bâliğan mâ-belağ ecr-i misil lâzım gelir.
İkinci sûretde ecr-i müsemmâyı tecâvüz etmemek şartıyla ecr-i misil lâzım gelir.

( Bâb-ı Sâlis )

( Ücrete müteallik mesâil beyânında olup üç faslı hâvîdir )

( Fasl-ı Evvel )

( Bedel-i icâre hakkındadır )

463 Madde Bey‘de semen olmağa sâlih olan şey icârede bedel olmağa
sâlih olduğu gibi semen olmağa sâlih olmayan şeyler dahi bedel-i icâre
olabilir.
Meselâ bir hayvân mukâbilinde yâhud bir hânenin süknâsı mukâbilinde bir bostân
istîcâr olunabilir.

464 Madde Bedel-i icâre nakd ise semen-i mebî‘ gibi mikdârını ta‘yîn
ile ma‘lûm olur.

465 Madde Bedel-i icâre ‘urûzdan yâhud mekîlât yâ mevzûnât yâhud
‘adediyât-ı mütekâribeden olduğu hâlde mikdârıyla berâber vasfını dahi
beyân etmek lâzım gelir.