91

Ve mal sahibi bunda muhayyer olup dilerse mahmûl olarak kıymetini tazmîn ettirir ve ücretini ve dilerse gayr-i mahmûl olarak tazmîn ettirip ücret vermez.

( Bâb-ı Râbi' )
( Müddet-i İcâreye Müteallik Mesâili Beyânındadır )

484 Madde Bir kimse gerek yevm gibi kasîr olsun ve gerek sinîn gibi tavîl olsun ma'lûm olan müddet üzerine mal ve mülkünü âhare îcâr edebilir.
485 Madde Müddet-i icârenin ibtidâsı hîn-i akd'de tesmiye ya'ni zikr ve ta'yîn olunan vakitten i'tibâr olunur.
486 Madde Hîn-i akd'de ibtidâ-yı müddet tesmiye olunmaz ise vakit-i akd'den i'tibâr olunur.
487 Madde Bir senelik olmak üzere her aylığı şu kadar kuruşa olarak bir akarın îcârı câiz olduğu gibi şehriyesi beyân olunmaksızın bir senelik olmak üzere şu kadar kuruşa îcârı dahi sahîh olur.
488 Madde Ayın ibtidâsında iken icâre gerek bir aylık olsun ve gerek ziyâde olsun şehriye olarak mukâvele olunur ise aylık olmak üzere mün'akid olur bu sûretde ay otuz günden nâkıs olsa dahi tamâm aylık i'tâsı lâzım gelir.
489 Madde Ayın bir azı geçmiş iken bir aylık olmak üzere mukâvele olunduğu sûretde bir ay otuz gün olmak üzere i'tibâr olunur.
490 Madde Ayın bir azı geçmiş iken şu kadar aylık olarak mukâvele olunur ise evvelki nâkıs ay en sonraki aydan otuz gün olmak üzere itmâm olup ücreti yevmiye hesâbiyle itfâ olunur ve ara yerdeki aylar gurre ile hesâb ve i'tibâr kılınır.
491 Madde Ayın bir azı geçmiş iken kaç aylık olduğu beyân olunmaksızın her aylığı şu kadar kuruşa olmak üzere mukâvele olunduğu sûretde ibtidâdaki nâkıs ay otuz gün i'tibâr olunmak lâzım gelmeyeceği gibi dîger aylar dahi o vechile otuz gün olmak üzere i'tibâr olunur.