94

Derziye bez verirse yahud şu kadar günde Mekke’ye yetişdirmek üzere
bir âdemden deve istikrâ etse icâre câiz olur
ve âcir şartı îfâ eder ise ecr-i müsemmâ alır ve îfâ etmez ise ecr-i müsemmâyı
tecâvüz etmemek üzere ecr-i misil alır.

506 Madde Amelde ve âmilde ve haml ve mesafede ve mekânda ve zamanda iki
ya üç sûret üzerine ücretin terdîdi sahîh olur
ve her kangı sûret fi’le çıkar ise ana göre ücret i’tâsı lâzım gelir.
Meselâ iğne ardı dikmek üzere şu kadar ve oyulgama dikmek üzere
bu kadar kuruşa pazarlık olundukda kangı sûretde dikilür ise ana göre
mukavele olunan ücretin i’tâsı lâzım gelir.
Yahud bir dükkânda attârlık etmek üzere şu kadar ve tütüncülük işlemek üzere
bu kadar kuruşa mukavele olundukda müste’cir kangı ameli icrâ eder ise ana göre
ücret-i muayynesini i’tâ eder.
Ve kezâ bir dâbbeye Bağdâdî yükletmek üzere şu kadar ve timur yükletmek üzere
bu kadar kuruşa istikrâ olundukda kangısını yükledir ise ana göre muayyen
olan ücreti verir.
Yahud mekkâri şu hayvanı Çorlu’ya dek yüz ve Edirne’ye dek iki yüz
ve Filibe’ye dek üç yüz kuruşa îcâr etdim dedikde müste’cir nereye gider ise
orasının ücretini i’tâ eyler.
Ve kezâlik âcir şu hâneyi yüz ve bu hâneyi iki yüz kuruşa îcâr etdim
deyüb müste’cir dahi kabûl etdikden sonra her kangısında sâkin olur ise
anın içün muayyen olan ücreti vermesi lâzım gelir.
Kezâlik bir kimse bir cübbeyi derziye bugün dikerse elli ve yarın dikerse
otuz kuruş vermek üzere pazarlık etse câiz ve şartlar mu’teber olur.

( Fasl-ı Sâni )
( Hiyâr-ı rü’yet hakkındadır )

507 Madde Müste’cir içün hiyâr-ı rü’yet vardır.
508 Madde Me’cûrun rü’yeti menâfiin rü’yeti gibidir.
509 Madde Müste’cir görmeden bir akar’ı isticâr etse gördükde muhayyer olu[r]