11

Hilâf-ı usûl bir şey zuhûr eder ise o halde hey’et mes’ûl tutulacakdır

Otuz üçüncü madde — Beher senenin gayetinde her kazâda şehriye hülâsa defterleri birleştirilerek bir sâl-i umûm muhâsebe defteri tanzîm olunacak ve bunda bir sene içinde envâ-i emvâl-i devletden ne kadar şey tahsîl olunduğu ve şâyed bakâyâ kalacak olur ise ne mikdâr idüğü ve tahsîlât-ı vâkıadan ne yolda sarfiyât ve teslîmât ve medfûât vukûbulduğu ve masârif-i mukanneneden îfâ olunmamış ne mikdâr şey kaldığı beyân olunub şehriye defterlerinde olduğu gibi meclis-i idâre tarafından zîrine mazbata yazılarak bittemhîr re’s-i livâdan beher ay i’tâ kılınacak şehriye defteri ilmühaberleriyle ma’an takdîm kılınacakdır ve bu defterlerin dahi bir nümûnesi merbûtdur bu defterler nihâyetü’n-nihâye martın on beşinde ikmâl olunarak re’s-i livâya gönderilmek üzere yola çıkarılacak ve bu defterler ve gerek otuz birinci maddede muharrer şehriye hülâsaları evkât-ı muayenesinde çıkarılamadığı takdîrde mâl müdîri azl ve tebdîl edileceği gibi zikr olunan defter ve hülâsaların te’ahhur-i tanzîm ve irsâline kâimmakâm veyâhûd sandık emîni sebeb olmuş ise anlar dahi kânûnnâme-i hümâyûnun yüz ikinci bendi ahkâmına tevfîkan mücâzât görecekdir

( Bâb-ı Sâlis )

( Livâda emvâl-i devletin idâresi )

( Fasl-ı Evvel )

( Emvâl-i devletin tahsîl ve kabzı )

Otuz dördüncü madde — Livâda emvâl-i devletin tahsîline mutasarrıf ve muhâsebesinin rü’yet ve tanzîmine muhâsebeci me’mûr olduğu gibi alel-umûm emvâl-i devletin idâre ve muhâfazası ve hesâbından mutasarrıf ile berâber muhâsebeci müştereken mes’ûldür masârifât-ı mukannene ve me’zûnenin emr-i sarfı ikisinin inzimâm-ı re’yine mevkûfdur

Otuz beşinci madde — Beher sene mart ibtidâsında merkez-i vilâyetden livâya bir cihetde sancağın sâl-i hâl emvâlinden tahsîl olunacak vâridâtın