146

( Sûret-i Hatt-ı Hümâyûn )
( Mûcibince amel oluna )

( Taşralarda kâin bi'l-cümle evkâf-ı şerîfenin cihât-ı idâresiyle evkâf )
( müdürlerinin harekât ve icrâât-ı âtî hakkında yedlerinde bulunan atîk lâyihanın )
( ba'd-ezîn hükmü cârî olmamak üzere bu kere dokuz fasıl ve elli altı )
( bendi şâmil kaleme alınan nizâmnâme lâyihasıdır )

( Birinci fasıl evkâf müdürlerinin meclis-i memlekete mürâcaatına mecbûriyetlerine )
( ve tutacakları usûl ve kuyûda dâirdir )

Birinci bend: Evkâf müdürleri bulundukları memleketin meclis a'zâsından
olduklarından eyyâm-ı mahsûsasında bulunacakları gibi ba'd-ezîn sâir me'mûrîn
misillü beher gün maiyetlerinde bulunan kâtipler ile berâber hükûmet-i mahalliye dâiresinde
bulunarak kâffe-i husûsât-ı evkâf-ı şerîfe zîrde muharrer bendlerde beyân olunan
sûretlere tevfîkan dâire-i mezkûrede rü'yet olunacak ve defâtir ve muharrerât-ı sâire
dahi orada tesviye ve tahrîr olunarak hârice çıkarılmayacak ve hiç bir sebeb
ve vesîle ile bunun hilâfı hareket vukûa getirilmeyecektir. Evkâf müdürlüğüne
mahsûs iki parça bir mühür olup bir parçası evkâf müdürünün yanında
bulunacak ve dîger parçası dahi meclisin mühür kutusu içinde hıfz
olunacaktır.

İkinci bend: Emvâl-i evkâf-ı şerîfeden tahsîl olunan mebâliğin kâffesi
evkâf müdürleri yedlerinde tevkîf olunmayıp doğruca mahalleri sandık ümenâsına
bi't-teslîm emvâl-i sâireye karıştırılmayarak başkaca bir sandığa vaz' ile hıfz
olunacak ve işbu sandığa girecek ve sandıktan çıkacak mebâliğ içün evkâf
müdürleriyle sandık emînleri taraflarından karşılıklı olarak başka başka defter
tutulacak ve ikisinin dahi ma'lûmâtı olmaksızın sandığa akçe girip
çıkması câiz olmayacaktır ve sandık emînleri emvâl-i evkâfın dahi başkaca
muhâfazası hizmetinde bulunacaklarından kendilerine mahallerine ve îcâbına göre
evkâf hazînesinden dahi bir mikdâr maâş verileceğine ve evkâf müdürleri
misillü anların dahi hazînece mu'teber kefilleri alınacağına mebnî işbu evkâf sandığına
teslîm olunacak akçe içün verilecek makbûzları müştereken temhîr etmeleri
lâzım.