170

( Musakkafat ve müstegallât-ı evkafın muâmelâtı )
( hakkında nizamnamedir )

( Fasl-ı Evvel )

( Evkâf-ı şerîfenin envâına ve hukuk-ı tasarrufiyeye dairdir )

Birinci Madde: Memalik-i Devlet-i Aliyye’de bulunan evkaf iki kısım olup birincisi evkaf-ı mazbûta ve ikincisi evkaf-ı gayr-ı mazbûtadır. Evkaf-ı mazbûta, tevliyet ve idaresi veyahut tevliyeti meşrutunlehi uhdesinde bulunduğu halde yalnız idaresi mazbut olan ve kâffe-i mesalihi doğrudan doğruya Hazine-i Evkaf-ı Hümayun’dan idare olunan evkaftır. Ve evkaf-ı gayr-ı mazbûta, Evkaf-ı Hümayun Hazinesi’nin nezaret ve indimam-ı malumatıyla mütevellileri tarafından idare olunan evkaftır.

İkinci Madde: Üzerinde ebniye olan ve ebniye ahdâsına muidd ve mahsus bulunan mahallere musakkafat ve ziraat ve gars-ı eşcar misillü bir cihet-i tasarrufiye ile istifade olunan araziye müstegallât denir. Ve gedikler musakkafat hükmündedir.

Üçüncü Madde: Evkâfa merbut olan arazinin envâına göre muâmelât-ı tasarrufiyesi Arazi Kanunname-i Hümayunu’nun dördüncü maddesinde muharrer olan ahkâma tâbidir.

Dördüncü Madde: Musakkafatın bir kısmı icareteyn ile ferağ ve teferruğ ve kısm-ı diğeri icare-i vahide suretiyle taraf-ı vakıfdan tasarruf olunur. Ve icareteyne merbut olan musakkafat, canib-i vakıfdan hin-i tefviz ve isticarında kıymet-i hakikiyesine müsavi taraf-ı vakfa bir muacele ve beher sene muayyen bir müeccele itasıyla tasarruf edilir. Ve ferağ ve intikali caridir. İcare-i vahideli olan musakkafat ve müstegallât, ferağ ve intikal cari olmamak üzere müddet-i muayyene ile taraf-ı vakıfdan icar olunan şeydir. Ve işbu nizamnamenin anlara şümulü yoktur.

Beşinci Madde: Evkaf-ı mazbûtadan bil-icareteyn tasarruf olunan musakkafat ve müstegallât evlad ve ahfad ve ebeveyn ve li-eb ve’l-ümm ve li-eb ve li-ümm’ler ve kız karındaşlara ve zevc ve zevceye ve evkaf-ı gayr-ı mazbûtadan icareteynli olan musakkafat ve müstegallât...
Yalnız