182

( Dersaadet ve bilâd-ı selâsede cari olan bend sularının suret-i müzayede )
( ve füruhtu ve zamm-ı icaratı hakkında bi'l-irade-i seniye )
( karargir olan nizamat )

Bend fazlası namıyla bundan böyle asılsız ve vücudsuz olarak müceddeden su
satılması külliyen men olunmuştur.
Han ve hane ve hamam misillü ebniye-i mevkufeye cari olan sular merbut
olduğu yerler ile birlikte mahlul olacağı cihetle bunlar yine merbut olduğu
mahaller ile beraber bi'l-müzayede bey ve icar kılınacak ve Tophane ve havalisine cari olan
suların beher masurasına on beş bin ve Dersaadet tarafında Kırkçeşme sularına
on iki ve Halkalı sularına on beş ve Boğaz içindeki yerli sularına yüz bin
kuruş fiyât takdir ve tayin olunmuş olduğundan bir suyun halli vukuunda
bunların kangı nevinden ise takdir kılınan bahası vakıflarına irad kayd olunacaktır.

Bazı uzak ve şerefsiz mevkilerde fi'l-asl hane ve akar iken muahharen harab
olup arsa olarak kalmış ve bostan veya bahçe yapılmış olan mahaller ile
mülk olan bina ve arsalara cari olan suların mahlulü vukuunda bunların
başkaca müzayede ve ihalesi icra olunacağı misillü bir suyun ferağ ve intikali
vuku buldukda dahi rüsum-ı mukarreresi fiyât-ı mezkûreye tatbikan ahz olunarak
kezalik vakfına irad kayd edilecektir.

Kadimden icaresi dûn olan suların ale'l-umum beher masurasına senevi
otuz kuruş icare-i müeccele tahsis kılınacaktır.