194

( Fasl-ı Sâlis )
( Mekâtib-i Âliye )

[Elli birinci madde] Mekâtib-i âliye dârülmuallimîn ve dârülmuallimât ve dârülfünûn ile fünûn ve sanâyi’ mektebleridir

( Dârülmuallimîn )

[Elli ikinci madde] Mekâtib-i umûmiyenin derecât-ı muhtelifesiçün mükemmel muallimler yetişdirmek üzere Dersaâdet’de bir büyük dârülmuallimîn te’sîs olunub üç şu’beye ve her şu’be biri edebiyâta ve diğeri ulûm ve fünûna mahsûs olmak üzere iki sınıfa münkasimdir birinci şu’be rüşdiye ve ikinci şu’be i’dâdiye ve üçüncü şu’be sultâniye mekteblerine muallim yetişdirmeğe mahsûsdur

[Elli üçüncü madde] Rüşdiye şu’besi iki dâireye münkasim olub birincisi İslâm ve ikincisi sunûf-ı gayr-i müslime mekâtib-i rüşdiyesiçün yetişdirilecek muallimlere mahsûsdur

[Elli dördüncü madde] Rüşdiye şu’besi müddet-i tahsîliyesi üç sene olub sınıfına göre zîrde muharrer dersler okutdurulacakdır

( Edebiyât Sınıfı )
Türkçe kitâbet ve inşâ . tertîb-i cedîd üzere tedrîse iktidâr kesb edilecek derecede Arabî ve Fârisî . ( Her cemâatin kendi lisânı ) . târîh-i umûmî . her milletin kendi lisânı üzere tedrîs edilecekdir

( Ulûm Sınıfı )
Tersîm-i hutût . hisâb . defter tutmak usûlü . hendese . mesâha . cebr . ( Her cemâatin kendi lisânı üzere tedrîs kılınacakdır )

[Elli beşinci madde] İ’dâdiye şu’besinin müddet-i tahsîliyesi iki sene olub sınıfına göre zîrde muharrer olan dersler ta’lîm edilecekdir

( Ulûm Sınıfı )
İlm-i mevâlid . hendese-i resmiye ve menâzır . cebr . hikmet-i tabîiye . kîmyâ . resim .

( Edebiyât Sınıfı )
Arabî ve Fârisîden tercüme ameliyâtı . Türkçe şi’r ve inşâ . Fransızca . kavânîn-i Osmâniye . mantık . ilm-i servet-i milel .

Elli