199

Seksân üçüncü madde: Ulûm-ı tabîiye ve riyâziye şubesinde hey’et ve hikmet-i tabîiye ile ilm-i kîmyâ ve ilm-i tabakâtü’l-arz ve ilm-i maâdin ve ilm-i nebâtât ve ilm-i hayvânât ve hendese ve müsellesât ve hendesenin cebre tatbîki ve hendese-i resmiye ve menâzır ve hesâb-ı tefâzulî ve temâmî ve cerr-i eskaalın nazariyât ve tatbîkâtı ve târîh-i ulûm-ı tabîiye ve riyâziye ve fenn-i tahtît-i arâzî tedrîs olunacakdır.

Seksân dördüncü madde: Dârülfünûn’da okutturulacak dersler Türkçe takrîr olunacak ve Türkçe takrîre muktedir mükemmel muallimler yetiştirilinceye kadar Fransızca takrîr olunmak câiz olacakdır.

Seksân beşinci madde: Her şubenin müddet-i tahsîliyesi me’zûniyet ruûsunu alacaklar için üç ve müderris olacaklar için dört seneden ibâret olacakdır.

Seksân altıncı madde: Her şube sınıflarının ders cetveli beher sene başında o şubenin muallimleri tarafından tanzîm ve Dârülfünûn nâzırı ile Maârif Nezâreti tarafından tasdîk olunacakdır.

Seksân yedinci madde: Dersler muallimler tarafından şifâhen ve alenen takrîr kılınacak ve ders istimâı için dershâneye girmek isteyenlere memâni’at olunmayacakdır.

Seksân sekizinci madde: Lâ-akal on altı yaşında olan her bir şahıs Dârülfünûn’un nizâmâtına ittibâ’ eylediği hâlde talebe sınıfına kayd olunabilecekdir.

Seksân dokuzuncu madde: Dârülfünûn’a girecek talebe Dersaâdet’de ikâmet eylediği mahalli beyân ile berâber hîn-i hâcetde şube müdîri tarafından kime mürâcaat olunmak îcâb edecek ise anı dahi irâe edecekdir.

Doksanıncı madde: Dârülfünûn şâkirdânı silikine dâhil olmak isteyenler muâmelât-ı meşrûhayı icrâ eyledikden sonra her şubeden bir muallim alınarak teşkîl olunacak mümeyyiz hey’eti huzûrunda lisân-ı Osmânî ile târîh-i umûmî ve coğrafyâ