203

Yüz on altıncı madde: Dârülfünûn nâzırının şehriye maaşı yedi bin beş yüz guruş olacak ve şube müdürlerinin maaşları dahi muallimlik maaşına biner guruş ilavesiyle tahsis kılınacaktır.

Yüz on yedinci madde: Her sınıfda bir mubassır bulunacağı gibi lüzumu mikdar hademe dahi bulunarak mubassırların şehriye maaşı üç yüz ve hademenin maaşları yüz elliden iki yüz ellişer guruşa kadar olacaktır.

Yüz on sekizinci madde: Dârülfünûn’un eyyâm-ı tatiliyesi evvelâ her haftanın cuma ve pazar günlerinden, sâniyen her sınıfın a‘yâd ve eyyâm-ı mahsûsalarından, sâlisen ramazandan, râbian imtihandan sonra bir ay müddetten ibaret olacak ve cülûs-ı hümâyûn yevm-i mahsûsunda dahi tatil edilecektir.

Yüz on dokuzuncu madde: Dârülfünûn’da bir kütüphane te’sis olunacaktır.

Yüz yirminci madde: Kütüphane müdürü Dârülfünûn nâzırının inhâsı ve Maârif Nezâretinin takrîri üzerine ba-irâde-i seniye tayin olunur. Şehriye maaşı iki bin beş yüz guruşdur.

Yüz yirmi birinci madde: Kütüphane içün senevî yirmi beş bin guruş tahsis olunacaktır.

Yüz yirmi ikinci madde: Kütüphane hibe ve vasiyetle verilecek hedâyâyı kabul edecek ve sâir kütüphanelerle kitap mübadele edebilecektir.

Yüz yirmi üçüncü madde: Kütüphane Dârülfünûn muallimleriyle talebe içün her gün ve umûm içün evkât-ı muayyenede açık bulunacaktır.

Yüz yirmi dördüncü madde: Dârülfünûn’un mahsûs bir sandığı olacak ve bunun idaresi Dârülfünûn nâzırının inhâsıyla ve Maârif Nezâretinin takrîri üzerine ba-irâde-i seniye bir me’mûr-ı mahsûsa havâle kılınacaktır.

Yüz yirmi beşinci madde: Dârülfünûn vâridâtı evvelâ sandığa kâmilen teslim olunan kaydiye ve müsvedde ve imtihan harçları hâsılatından, sâniyen hedâyâ ve mevkûfâtdan, sâlisen taraf-ı devletden verilecek iâne-i seneviyeden ibarettir.