223

Ve bend-i mezkûr imzalı olsa bile hilâf-ı nizâm ve kânûn olduğu sûretde gazeteci dahi müştereken mes'ûl tutulacaktır.

Sekizinci Madde: Dersaâdet'de Matbûât Müdîrliği tarafından ve taşralarda hükûmet-i mahalliyye cânibinden gazetelere irsâl olunan muharrerât-ı resmiyyeyi gazeteci ilk veyâ ikinci def'a çıkaracağı gazetesine bilâ-ücret derc etmeğe mecbûr olacakdır.
Bir gazetede bir zâtın ismi tasrîhle veyâ îmâ tarîkıyla bir fıkra derc olunub da ol zât tarafından gazeteciye cevâb gönderildikde gazeteci bu cevâbı ilk veyâ ikinci neşr olunacak nüshaya derc edecekdir.
Verilen cevâb bilâ-ücret tab' olunub âid olduğu bendin iki mislinden ziyâde olmayacakdır.

Dokuzuncu Madde: Mevâdd-ı politikiyye ve mülkiyyeyi şâmil olmak üzere Devlet-i Aliyye'ye taarruz ve husûmet efkârıyla memâlik-i ecnebiyyede tab' ettirilen gazete ve evrâk-ı mürettebe-i sâirenin Memâlik-i Şâhâne'ye idhâl ve neşri memnû'dur.

( İkinci Fasıl )
( Mevâdd-ı Cezâiye )

Onuncu Madde: Her kim Devlet-i Aliyye'nin ruhsatı olmaksızın ya'ni hilâf-ı nizâm gazete veyâ bir varaka-i mürettebe ihdâs ve neşr eder ise neşr etmiş olduğu nüsha veyâ cüz'lerin her biri içün on aded yüzlük altın cezây-ı nakdî ahz olunacak ve bu sûretde neşr olunan gazete ta'tîl ettirilecekdir.

On Birinci Madde: Nizâmnâmenin dördüncü maddesi ahkâmına mugâyir olarak her kim gazetesinin imzalı bir nüshasını merciine irsâl etmez ve imzasız gazete neşr eder ise kezâlik on aded yüzlük altın cezây-ı nakdî alınacakdır.

On İkinci Madde: Bir gazeteci sekizinci madde mûcibince cânib-i hükûmetden irsâl olunan muharrerât-ı resmiyyenin derc ve neşrinden imtinâ' eder ise iki yüzlük altından yirmi beş altına kadar cezây-ı nakdî alınır ve efrâd tarafından
(gönderilen)