226

Otuz İkinci Madde
Gazetelerce vuku bulan cünhalar tarih-i vukuundan itibaren altı ay mürur edip de hükümetçe veyahut efrad-ı nâs tarafından dava olunmamış olur ise müddet-i mezkûre inkızasından sonra bu misillü dava istimaı caiz olamayacaktır.

Otuz Üçüncü Madde
Gazetelerce vuku bulacak cünha ve cinayetlerin mükerrerleri hakkında gerek hükümet tarafından bilâ-muhakeme icra kılınacak ve gerek mahkemece hükm olunacak mücazat ceza-yı muayyenin nihayet iki misline iblağ olunabilecektir.

Otuz Dördüncü Madde
İşbu nizamnamenin on beşinci ve on yedinci ve on dokuzuncu ve yirmi birinci ve yirmi dördüncü maddelerinde beyan olunan cinayet ve cünhaların hîn-i vukuunda Bâb-ı Âli’de beş zattan mürekkep tayin olunacak komisyonda tahkikat-ı lazıme bil-icra tanzim ve ita kılınacak zabta üzerine Meclis-i Ahkâm-ı Adliye’de cezası hükm olunacak ve sair maddelerinde beyan kılınan cünha ve kabahatler dahi Zaptiye mahkemelerinde rüyet ve hükm kılınacaktır.

Otuz Beşinci Madde
İşbu nizamname zîrde muharrer tarihten itibaren destûrü’l-amel tutulacaktır.

Fî 2 Şaban sene 1281
Fî 19 Kânûn-ı Evvel sene 1280

Matbaa