257

Altmış dokuzuncu madde: Bir şâkird bilâ-özür üç ay devâm etmez ise kırkıncı madde mûcibince mektebden ihrâc olunacaktır.

Yetmişinci madde: Bir şâkird rufekâsına kavlen ve fiilen tecâvüz ettiği veyâhud eşyâsına bir gûna îsâl-i hasâr eylediği takdîrde yedinde tahsînnâme var ise ahz edilecek ve yok ise muallimi tarafından alenen ta’zîr ve tekdîr olunup zarar îrâs ettiği eşyâ dahi tazmîn ettirilecektir.

Yetmiş birinci madde: Bir şâkird muhill-i âdâb büyük kabahat veyâhud cinâyetde bulunur ise icâbı Dersaâdet’de ise Maârif Nezâret-i Celîlesinden ve eyâletlerde ise hükûmât-ı mahalliyeden istizân olunacaktır.

Yetmiş ikinci madde: Muallimîn ve hademeden birisi vezâif-i me’mûresini vakit ve zamânıyla ifâda tekâsül ettiği hâlde muallim-i evvel tarafından kendilerine ihtârât-ı muktaziye icrâ kılınacaktır.

Yetmiş üçüncü madde: Bilâ-özür-i kavî vezâif-i me’mûresini ifâda kusûr eden muallimîn ve hademeye evvelâ muallim-i evvel tarafından ihtârât-ı lâzıme icrâ kılınup bir fâide görülemediği hâlde keyfiyet bi’t-takrîr Maârif Nezâret-i Celîlesine bildirilip tebdîl olunacaklardır.

Yetmiş dördüncü madde: Özür-i kavîsi olmayarak hizmet-i tedrîsiyesini ifâ etmeyen muallimler hakkında Maârif Nizâmnâmesinin yüz seksen altıncı maddesi mûcibince muâmele olunacaktır.

Fî 25 Cemâziye’l-âhir sene 1287

33