275

Elli beşinci madde: Talebeden birisi mekteb dâhilinde bir şey sirkat edüp de fi'l-i sirkatde sâbıkası bulunur veyâhûd sâbıkası yoğise de mektebin hâricinde az ve çok bir şey sirkat etmiş olur ise ol şâkird talebe-i dâhiliyeden olduğu veyâhûd talebe-i hâriciyeden olub da on beş on altı yaşını geçmemiş nâ-bâliğ bulunduğu hâlde tam bir ay habs olundukdan sonra üç aydan bir seneye kadar ıslah dâiresine konulur ve eğer talebe-i hâriciyeden olub da sinn-i bülûğu mütecâviz ise tard ile zabtiyeye teslim kılınur.

Elli altıncı madde: Talebeden birisi diğerini amden ta'tîl edecek derecede cerh etmiş olur ise o makûleler hakkında dahi elli beşinci maddede muayyen muâmele ile cezâ edilir.

Elli yedinci madde: Mektebin dâhili şu'besinden firâr edenler ilk def'a ise vücûdunun tahammülüne göre on değnekden yirmi değneke kadar darb olundukdan sonra bir hafta riyâzet cezâsı ve altı aya kadar mektebden taşra çıkmamak kâidesiyle mücâzât olunur ve eğer ikinci def'a ise darb ve riyâzetden başka hâl ve sıfatına göre üç günden bir aya kadar habs cezâsına dahi dûçâr olur.

Elli sekizinci madde: Gerek dâhili ve gerek hârici talebesinden birbirine fuhşiyâta ve ef'âl-i şenî'aya dâir söz söyleyenler elli ikinci maddede muharrer cezâya dûçâr olur ve eğer âdâb ve ahlâk-ı haseneye mugâyir ef'âle tasaddî edenler olur ise vücûdunun tahammülüne göre on değnekden yirmi değneke kadar darb ve üç günden bir aya kadar habs olunur ve bu fi'le mütecâsir olan talebe-i dâhiliyeden ise tam altı ay mektebden taşra çıkması men' edilir ikinci def'a böyle bir fi'le cür'et eyleyenler hakkında bu cezânın iki katı icrâ olundukdan başka elli beşinci maddede muayyen olan muâmele îfâ edilir.

Elli dokuzuncu madde: Dâhili şu'besi talebesinin çubuk ve sigara içmesi yasak olduğundan buna cesâret edenler elli ikinci maddede muayyen cezâ ile te'dîb olunur.

Altmışıncı madde: Talebe-i hâriciyeden bir senede beş def'a habse girenler bâliğ...