291

Ve işbu darb çavuş veyâhut çavuş vekîlleri hakkında olur ise dâribin cezâsı dahâ ağır olacakdır ve dördüncüsü lüzûmsuz yere bağırub çağırmakdır her ne vakit olur ise olsun böyle gürültü iden ve tenbîhi diñlemeyen çocukların hakkında îcâbına göre bir gün ve iki gün riyâzet cezâsı hükm olunub beş ve on gün ıslahhâneden taşra çıkmaları memnû‘ tutulacakdır.

Otuz dokuzuncu mâdde: Çocukların gerek akşam üzeri teneffüs içün ıslahhâneden çıkdıklarında ve gerek akrabâları hânelerine salıvirildiklerinde gidüb gelürler iken gâyet edeb üzre hareket itmek ve mahalle çocuklarıyle karışmamak lâzım olduğundan uslu gidüb gelmeyen ve mahalle çocuklarıyle karışık ve anlarla oyun oynamak gibi hareketde bulunan ve yarım sâatden ziyâde geç kalan şâkirdân bir hafta ve on beş gün ve bir ay ve iki ay ve îcâbına göre dahâ ziyâde müddet ıslahhâne kapusundan taşra salıvirilmeyecekdir.

Kırkıncı mâdde: Şâkirdândan birisi dikkatsizlikle elbisesini yırtmış olur ise müceddeden yapdırılub bahâsı kendüsünün yevmiyesi olduğu hâlde andan tazmîn itdirilecek ve olmadığı hâlde ilerüdeki yevmiyesinden kesilmek üzre defterine işâret olunub o makûle çocuk hakkında bir gün riyâzet cezâsı hükm olunacakdır.

Kırk birinci mâdde: Çocuklardan birisi ıslahhâne içinde az ve çok bir şey sirkat itmiş ya‘nî çalmış olur ise muhâkemesi görülerek tebeyyün itdiği hâlde ol çocuk üç günden on güne kadar habs olunacak ve üç ay müddet ıslahhâneden taşra salıvirilmeyecekdir ve ikinci def‘asında yine bir şey çalar ise bu cezâ iki kat icrâ kılınacakdır ahz olunan şey ıslahhâne hâricinde ise dahâ ziyâde ağır cezâ hükm olunacakdır ve koğuşların birinde bir şey çalınub da meydâna çıkmaz ise o koğuşda olan çocukların o gün yemeği virilmeyecekdir ve bir koğuşda hırsızlık vukû‘ bulub da çavuş veyâhut çavuş vekîli işitdikleri hâlde haber virmez ise anların da iki günlük riyâzet cezâsı görmeleri lâzım gelecekdir.

Kırk ikinci mâdde: Bir çocuk dîger bir çocuğun uyur iken elini ve ayağını bağlamak