297

Bulunmak ve mektebde tedris olunan dersleri kendü hanelerinde tekrar mütalaa etmeğe ve hocalar tarafından tenbih olunan ders müsveddelerini kaleme almağa mecburdurlar.

Altıncı Madde: Şakirdan mekteb müdirinin takriri üzerine Orman Müdîriyeti tarafından tayin olunacak evkatda mektebde taallüm ve tederrüs etdikleri kavaidin icra-yı ameliyatı zımnında her sene on beş yirmi gün ormanlarda geşt ü güzar edeceklerdir ve bundan dolayı vuku bulacak masarif onuncu maddede gösterildiği vechile hazineden tesviye olunacaktır.

Yedinci Madde: Şakirdandan biri hâlen ve bi-tavran şayan-ı takbih göründüğü veyahud emr-i tahsilinde tehavün ve rehaveti vuku bulduğu suretde kendisine ihtarat-ı lazıme icra olunacak ve icabı takdirinde mektebin jurnalına dahi kayd ve tastir olunmak üzere âti-üz-zikr te’dibat-ı selâseden birine yani evvelâ mekteb müdiri tarafından tekdir olunmak sâniyen Orman Meclisi hazır olduğu halde Müdîriyet tarafından muamele-i tekdiriye icra kılınmak sâlisen Müdîriyetin takriri üzerine Maliye Nezaret-i Celilesi canibinden verilecek emir üzerine mektebden tard edilmek cezasına mazhar olacakdır.

Sekizinci Madde: Şakirdanın icra-yı imtihanıyla iki sınıfden her birinin sırasıyla tertibi zımnında her sene ahirinde bizzat Maliye Nazırının veyahud tarafından tayin olunacak memurun riyaseti tahtında bir imtihan meclisi akd ve teşkil edilecek ve Orman Müdiri ve mektebin müdir ve hocaları bu meclisin aza-yı tabiiyesinden olduğu gibi bunlara ikisi Orman Meclisi azasından olmak üzere canib-i nezaretden diğer dört aza ilave olunacakdır.

Dokuzuncu Madde: Şakirdandan meclis-i imtihanda derece-i kifayede isbat-ı malumat-ı müktesebe edemeyenlerin esamisi mekteb defterinden terkin olunacakdır fakat esna-yı tahsilde hüsn-i hareket ve sa’y ü gayret etmiş olanlar hakkında meclis-i mezkûrun re’y ve kararıyle birinci veyahud ikinci sene derslerini bir sene daha tekrar