313

olan karyeler muhtarlarından bilâ-vasıta kifayet edecek mikdar amele-i mükellefe isteyebilecekdir fakat yapılması ne kadar akçeye mevkuf olan veyahud bir gûne uygunsuzluk ve mazarrat olmaksızın te’hiri mümkün görünen ta‘mirat yollar inşası hakkında beyan olunan usule tevfikan icra kılınacakdır bu makule ta‘mirat içün celb olunacak ameleye bekçibaşı işbaşılık ve kaza sevk me’murluklarını dahi ifa eyleyecekdir

On ikinci madde — Yol bekçileri maaşlarını bekçibaşı vasıtasiyle alacaklardır bekçibaşı maiyyetinde bulunan bölüğün maaşları içün başmühendis tarafından kendisine verilmiş olan te’diye pusulaları mucibince yekûn-ı maaşatı irae ile mal sandığından makbuz senedi vererek ahz eyleyecek ve nihayet sekiz gün zarfında aldığı akçeyi bekçilere i’ta ile te’diye pusulalarını anlara temhir etdirerek sandığa gönderüb kendisinin makbuz senedini geriye alacakdır

On üçüncü madde — Yol bekçileri derece-i gayret ve kabiliyetlerine göre üç sınıfa taksim olunub her sınıfın birer alâmet-i fârikası olacak ve her sancakda altı bekçiden nihayet biri birinci sınıfdan ve ikisi ikinci ve maadası üçüncü sınıfdan bulunarak bunların sınıflara taksimi mühendisin ifadesi üzerine mutasarrıf tarafından icra olunacakdır hizmetlerince fevkalâde eser-i gayret gösteren bekçilere nihayet bir maaşına muadil sene nihayetinde atıyye verilerek haklarında icra-yı mükâfat olunacakdır bi’l-akis içlerinden rehavet edenler ve itaatsizlik gibi uygunsuz hareketde bulunanların birinci derecede maaşlarının rub‘u ve ikinci defada sülüsü ve üçüncüde nısfı ve dördüncüde üç rub‘u ve beşinci defada tamamı kesilecek ve işbu cezaya bekçibaşının ifadesi üzerine başmühendis tarafından hükm olunacakdır ve bir sene içinde beş defa bu vechile mazhar-ı mücazat olan bekçiler tard edilecektir

( Fasl-ı Sâlis )
( Amele-i mükellefe nizamnamesinin vilayetlerde suret-i icrasına dairdir )

On dördüncü madde — Başmühendis imalata mübaşeret olunmak içün ta‘yin olunan vakitde tarikın güzergâhı mahallinde ta‘yin ve tehye eyledikden sonra