315

Muayyene hakkında talimat-ı umumiyenin tarif eylediği surete tevfikan koçan verecektir.

On Sekizinci Madde: Tarik emini baş mühendis tarafından verilmiş olan ifa-yı hizmet tezkiresine ilaveten şehir ve kasaba ve karyelerin mahal-i imalata olan bu’d-ı mesafesi için yüzde beş hesabıyla zammı lazım gelen yevmiye miktarını mübeyyin koçanlı bir cedvel tanzim ve ikisini birden kaza kaymakamına irsal ve teslim edecektir.

On Dokuzuncu Madde: Ameliyat-ı sınaiye için hin-i hacette ücretle istihdam olunmasına lüzum görülecek olanlar doğrudan doğruya baş mühendis ve hükümet-i mahalliye ve tarik emini taraflarından tahrir ve tertip edilecektir.

Yirminci Madde: Levazımat ve edevatın mübayaası ve amele-i mükellefeye irae olunmayacak inşaatın icrası için pazarlık etmek ve kontrato akd eylemek iktiza ettiği takdirde nihayet beş yüz kuruşluk bir şeye mahsus ve münhasır olmak üzere tarik eminiyle baş mühendis marifetiyle icra olunacak ve beş yüz kuruşu mütecaviz olan mukavelat hakkında tanzim olunacak kontrato senetleri yine tarik emini ve baş mühendis marifetiyle taati olunmak üzere liva idare meclisleri tarafından tasdik edilecek ve münasip görüldüğü halde tarik emini ve baş mühendis hazır oldukları halde meclisçe o misillü mukaveleye rabt olunacak mübayaatın münakasası icra edilecektir. Şu kadar ki taliplerin deruhde edecekleri levazımat esmanının akalli onda birine kefil alınmadıkça veya o miktar teminat akçesi ahz edilmedikçe ve üzerlerine alacakları imalatı icraya muktedir olduklarına dair baş mühendis tarafından yedlerinde şehadetname bulunmadıkça peyleri tutulmayacaktır.

Yirmi Birinci Madde: Baş mühendis inşaata müteallik levazımatın gayrı imalat için ayda nihayet üç yüz kuruşa kadar akçe sarf edebilecek ve meblağ-ı mezbur tarik eminiyle birlikte olarak vuku bulacak inhaları üzerine mal sandıklarından tesviye ettirilecektir.

Yirmi İkinci Madde: Gerek yevmiye ile ve gerek maktu ve bil-münakasa kontrato