318

( Maadin Nizamnamesidir )
( Bab-ı Evvel )
( Maadinin Aksamı Beyanındadır )

Birinci Madde — Gerek sath-ı arzda ve gerek zîr-i zemînde bulunan maadin suret-i i'mal ve idareleri i'tibariyle üç kısma münkasım olup birinci kısma maadin-i asliye ve ikincisine maadin-i sathiye ve üçüncüsüne ocak tesmiye olunur. İşbu nizamname iki kısma mahsus olup kısm-ı sâlis bu nizamın haricindedir.

İkinci Madde — Zîr-i zemînde damar veyahut tabaka veyahut arzın derinliğine doğru bir cism-i cesîm hey'etinde olarak vaki olup derûnunda altın ve gümüş ve platina ve cıva ve kurşun ve demir ve nuhas ve kalay ve çinko ve bismut ve kobalt ve nikel ve krom ve arsenik ve manganiz ve antimuan ve alüminyum ve kükürt ve zırnık ve şap ve enva-ı maden kömürü ve zift ve neft ve petrol ve daha sair bu misillü ecsamı ve her dürlü cevahir taşlarını müştemil olan maadine emr-i i'tibari olarak maadin-i asliye ıtlak olunmuştur.

Üçüncü Madde — Sath-ı arzda bir muntazam surette vaki olmayıp şurada burada bulunarak derûnunda demir olan mevaddı ve sülfata tahvili kabil etribe ile madenli kum ve şaylı topraklar ve cürûf-ı atîka ve turb ta'bir olunan mahrukat ve bu misillü az ameliye icrasıyla ihrac ve istihsal olunabilen sair ecsam-ı madeniyeyi havi olan maadine maadin-i sathiye tesmiye kılınmıştır.

Dördüncü Madde — Mermer ve somaki ve çakmak ve alçı ve kireç ve kaldırım taşlarıyla puzzolan ve porselen toprağı ve kum ve kil ve çanak çömlek ve lüle i'malinde isti'mal olunan topraklara bu nizamın hükmü şamil değildir.

Beşinci Madde — Maadin-i asliye ve sathiyeye ve bunlara mahsus kalhane gibi şeylere müteferri' bilcümle umum ve hususun rü'yet ve tesviyesi maadin idaresine aid olacaktır.

( Bab-ı Sâni )
( Maadin-i Asliye )
( Birinci Fasıl )
( Tedabir-i Umumiyeye Dairdir )

Altıncı Madde — Maadinin ihrac ve i'mali her halde emr ü irade-i seniye-i hazret-i padişahî şeref-sudûruna mütevakkıftır.

( Yedinci )