330

...içün iktiza eden ameliyatdan dolayı civarında olan diger bir madenin imalatına zarar geldigi takdirde bir sahib-i imtiyaz diger sahib-i imtiyaza tazminat virecek ve işbu tazminatın mikdarı tarafeynin ifadatı anlaşıldıkdan soñra maden meclisi tarafından tayin olunacakdır.

Elli dokuzuncu madde
Maden imali zımnında bil-icab muvakkaten hafr olunan bir mahal bir seneye degin evvelki gibi kabil-i ziraat bir hale girebilecek suretde ise oradan bir sene müddetde ahzı me'mul olan mahsulâtın bir mislini zamm iderek sahib-i imtiyaz sahib-i arza tazmin edecekdir.

Altmışıncı madde
Maden deruhde edenler magara ve kuyu hafr etdikleri ve maden içün sair dürlü sath-ı arzdan daimi suretde kullandıkları araziyi iştira içün arazi sahiblerinin rızasını tahsil edemedikleri halde arazi-i mezbureyi hükümet tarafından tahmin ve takdir olunacak kıymetlerinin iki mislini sahiblerine ita ile iştiraye mecbur olacaklardır.

( Beşinci Fasıl )
( Maadinin Usul-i Zabıtası )

Altmış birinci madde
Canib-i idareden icra olunacak tenbihat mucibince maden mühendisleri maden imal olunan mahallerde kâin ebniyenin muhafazasına ve arazisinin zarardan vikayesine dikkat ve nezaret edeceklerdir ve maden imalinde ahaliden istihdam olunacak amele ücret-i layıka ve kendü rızalarıyla kullanılıp bu yüzden kimseye bir gûna zarar ve hasar vukua getirilmemesine vali-i vilayet ve mühendisleri taraflarından daima takayyüd ve ihtimam olunacakdır.

Altmış ikinci madde
İşbu mühendisler madenin hafr ve imalinde gördükleri mahaziri veyahud lazım gelen islahatı maden mültezimlerine ve vaki olan muhatarat ve mugayir-i nizam harekatı mahalli hükümetine haber virüp keyfiyeti derhal canib-i idareye dahi iş'ar edeceklerdir.

Altmış üçüncü madde
Maden imalatı terk ve tatil olunur veyahud eşya-yı madeniyeyi imal ile me'luf olan sınıfın ihtiyacat-ı sınaiyeleri ihlal kılınur ise vali-i vilayetin ve mühendisin bu babda olan mütalaaları der-akab canib-i idareye ifade ve iş'ar olunacakdır.

( Altmış )