346

Kompaniye bilet vereceği vakit vuku bulacak ilânı vechile ne kadar müddet
zarfında mahallerine iadeyi taahhüt etmiş ise o kadar müddet zarfında iadeye
mecbur olacakdır. Hâmil olduğu biletde muharrer sınıf arabalarda binecek
mahal olmadığı halde kompaniyenin muvafakatini istihsal etmeksizin hiç
bir yolcunun mâfevkı olan diğer sınıf arabalara rükûba hakkı olmayıp
kompaniye razı olduğu suretde dahi bu makule aşağı sınıf arabalar
biletini hâmil olan yolcular ayrı mevkilere irkâb olunacakdır.

Yirminci Madde: Demiryollar hakkında olan işbu nizamname ile sair nizamat
ahkâmına tevfikan ahz olunacak cezay-ı nakdînin nısfı eyalet şose yolları
sandığına ita olunup hesapları Nafıa Nezâret-i Celîlesine beyan ve iş’ar
olunacak ve nısf-ı diğeri dahi kompaniye sandığına teslim olunup bunun ile
kompaniye memurlarından müstahak olanlara iane vermek üzere bir sermaye
tertip edilecek ve bu sermayenin suret-i idaresine vali-i memleket nezaret
edecekdir.

( Dördüncü Fasıl )

( Cinayet ve cünha ve kabahatlerin ve hilâf-ı nizam hareketlerin )
( İcra-yı tahkik ve muhakemesine dairdir )

Yirmi Birinci Madde: İşbu nizamnamede münderiç cinayet ve cünha ve kabahat
ve hilâf-ı nizam hareketlerin vukuunda atide muharrer usul vechile muamele
olunacakdır.
Birinci fasılda beyan olunan ahvalin vukuunda keyfiyet kompaniye veyahut
teftiş idare memurlarından biri tarafından komisere haber verilip komiser
mumaileyh hükümet-i mahalliye tarafından tayin olunacak zabıta memurunu
bil-istishab derhal tahkikat-ı lazıme icra etmek üzere cürüm veyahut kabahatin
mahal-i vukuuna azimet edecek ve dava mehakim-i adiyede rüyet olunacakdır.

İkinci fasılda beyan olunan ahval teftiş memurlarından biri tarafından
verilecek haber üzerine komiser tarafından tahkik olunacak ve muhakemesi
meclisde icra kılınacakdır.

Üçüncü