351

Âsâyiş-i umûmînin istihsâl ve vikâyesi zımnında telgrafın bazı kollarında veyâhûd her bir tarafında muhâberât-ı gayr-ı resmiyyeyi tatîl ve tevkîf buyurabilecektir.

On beşinci madde
Cinâyâta müteallik bazı husûsâtın tahkîk ve tedkîki zımnında ma‘lûmât-ı nâfia istihsâl olunacağı me’mûl olan mekâtîb-i gayr-ı resmiyye liecli’l-muâyene mehâkim ve hükûmet-i devlet-i aliyye tarafından resmen ve tahrîren taleb olunduğu hâlde irâe olunacaktır.

On altıncı madde
Bazı esbâb-ı mücbire ve meşrûaya mebnî mahalline vâsıl olamayan ya‘ni posta müddetinden ziyâde teehhür eyleyen ve bir de havanın fenâlığından kuvve-i seyyâle-i elektrikiyyeye sekte ve ârıza vukûuyla mefkûd hükmünde kalan ve bilhassa kelimâtında bi’z-zarûre tegayyür ve noksâniyyet zuhûra gelen muharrerâtın rüsûmâtı iâde olunarak sâhib-i telgrafın hiç bir gûna zarar ve ziyân da‘vâsına hak ve salâhiyyeti olamayacaktır.

( Beşinci Fasıl )

( Telgraf mekâtıbâtının ifşâ-yı esrârı mücâzâtı beyânındadır )

On yedinci madde
Telgraf mükâtebesi esrârını fâş eden telgraf me’mûrlarından bir Mecîdiye altınından yirmi beş Mecîdiye altınına kadar mücâzât-ı nakdiyye alınacak ve bir aydan bir seneye kadar hapis ile mücâzât olunacak ve telgraf hizmetinde bir daha istihdâm olunmayacaktır.

On sekizinci madde
Telgraf me’mûrlarından biri bi’n-nefs ifşâ-yı esrâr etmeyip de esrârın fâş olması esbâbını teshîl zımnında dîger bir kimesneye irâe-i tarîk eder ise me’mûr-ı merkûma müfşî-i esrâr nazarıyla bakılıp ol hâlde ikisi birden mazhar-ı te’dîb olacaklardır.

On dokuzuncu madde
İfşâ-yı esrâr eden telgraf me’mûru hakkında meâl-i telgrafın fâş olmasından dolayı gerek mektûbu ahz edecek adamın ve gerek sâhib-i mektûbun zarar ve ziyânı vukû bulup da tazmîni içün da‘vâ-yı kânûnî mûcebince muhâkeme olunmak ister ise ol me’mûru muhâkemeye da‘vet edebilecektir.