355

Otuz Altıncı Madde Telgraf hattına ârız olan bir hâdiseden ve gerek sâî
ve tatar ile gönderilecek olur ise bunların kusuru gibi sâir esbâb-ı mücbireden
nâşî tahrîrât-ı vâride sahibine postadan geç teslîm olunur ise te’diye olunmuş
olan mebâliğ sahibine iâde olunacakdır ve telgrafın gönderilmesinden matlûb olan
keyfiyeti ikmâl ve icrâ edemeyecek sehiv ve hatâ ile telgraf me’mûrları tarafından
telgrafın meâli tebdîl olunduğu takdîrde ücreti yine sahibine red kılınacakdır

( Sekizinci Fasıl )
( Telgraf merkezlerinde bulunan muhâbere me’mûrlarının )
( vazîfe-i hizmetlerine dâirdir )

Otuz Yedinci Madde Gerek Dersaâdet ve gerek Memâlik-i Mahrûse-i Şâhânede
bulunan kâffe-i telgrafhâneler me’mûrları Telgraf İdâre-i Umûmiyesinin taht-ı emrinde
ve maiyyetinde ve taşra telgrafhâneleri me’mûrları merkez müdîrlerinin ve merkez
müdîrleri dahi telgraf müfettişleriyle muâvinlerinin taht-ı emrinde olacakdır

Otuz Sekizinci Madde Taşra telgrafhâneleri müdîrleri telgraf alıp vermek
fenni tahsîliyle ve bulundukları mahallerde icrâya mecbur olacaklardır
Otuz Dokuzuncu Madde Makinelerin telgraf işinden başka bir şeye isti’mâli
külliyen memnû’ olduğundan bunların hüsn-i muhâfazasını telgrafhâneler müdîri
i’tinâ ve dikkat eyleyeceklerdir

Kırkıncı Madde Muhâbere me’mûrları müdîrleri tarafından tahsîs olunacak
nöbet üzere pîl ya’ni elektriğin eczâlarını hıfz ve hirâset edip kadeh
ve fincanları bu hizmete ta’yîn olunan adama vaktiyle temizlettirmeğe dikkat edecekdir

Kırk Birinci Madde Muhâbere me’mûrları isti’mâl etdikleri makinelerinin
gâyet temiz olmalarına dikkat ile her gün nöbete girdikleri vakitde postayı
muâyene edip lüzûmu takdîrince her bir kondakı ya’ni makinenin vidalarını
temizleyeceklerdir

Kırk İkinci Madde Me’mûrîn-i merkûme bed-hvâhlık ve yâhud kayıdsızlık ile