356

Makineleri bozar ise bundan makinelere terettüp edecek ziyandan kendileri mesul tutulacaktır. Bir muhabere memuru istimal ettiği makinede bir kusur olduğunu şüphe eder ise derhal keyfiyeti müdürüne ifade ile müdür-i mûmâileyh dahi işbu makineyi kendisi tebdil edip sahihan istimal olunmaz derecede ise tamir olunmak üzere makineciye gönderecektir.

Kırk Üçüncü Madde: Vasat hatt-da bulunan merkez memurları başında bulunan merkez memurları tarafından sual olunan maddelere derhal cevap vereceklerdir ve komikasyon istediklerinde hiç itiraz etmeyip icra edilecek ve eğer matlup olunan maddelere bir itirazları olur ise jurnale kayd ve derc edip müdürler tarafından keyfiyet telgraf idaresi canibine arz ve beyan olunacaktır.

Kırk Dördüncü Madde: Taşra telgrafhane müdürleri ve gerek refakatlerinde bulunan muhabere memurları icra-yı taâtî-i muhabere için nöbetleri vaktinde daima postada hazır olup yalnız taam vaktinde postadan ayrılabilecekler ise de daima bir neferi bil-münavebe postayı bekleyecek ve gece nöbetlerini dahi icra eyleyeceklerdir.

Kırk Beşinci Madde: Taâtî-i muhaberât-ı hususiyeyi tehir veyahut men eyleyen ve bir de birinci ve ikinci fasıllarda takaddüm-i muhaberât kaziyesine itina etmeyen ve menafi-i zatiyesiçün tağyir-i kelime ve tehir-i mekatibe teşebbüs eden her bir memur memuriyetten çıkarıldıktan başka nizamen müstahak olduğu cezayı dahi görecektir.

Kırk Altıncı Madde: Memurin hakkında olacak mücâzât dahi evvela tekdir ve saniyen nizamı vechile maaşından kat’ ve salisen memuriyetten tard olunmaktan ibaret olacaktır.

Kırk Yedinci Madde: Her bir memur büyüğü tarafından tekdir olunduğu halde telgrafhane jurnaline kayd olunup bir sene zarfında böyle üç defa tekdire müstahak olduğu halde dördüncüsünde memuriyetten tard olunacaktır.

Kırk Sekizinci Madde: Telgraf memurlarının kaffesi sınıf elbise-i mahsusalarını daima temiz halde olarak iktisaya mecbur olacaklardır.