365

Müddetçe hüsn-i muhâfazasından mes'ûl olacakdır ve bunın maiyyetinde bir me'mûr ile bir mağaza bekçisi bulunacakdır.

( Mâkineci'lik Me'mûriyeti )

İşbu me'mûr idâre-i telgrâfiyye mâkinelerini ta'mîr ve tanzîme me'mûr mahsûs olub bulunduğu odada sâir hîç bir kimsenin işini görmeğe ve yâhûd edevâtını ta'mîr etmeğe muktedir olamayacakdır ve maiyyetinde bir kimse bulunacakdır.

( Muvâsala-i Türkiyye Kalemi )

İşbu kalemin bir baş me'mûru olub telgrâfhâneye verilen tahrîrâtı doğruca mahalline îsâle ve taşralardan gelen muharrerâtı ahz ile der-akab mahalline gönderilmek üzere sevk kalemine i'tâya me'mûr olacak ve maiyyetinde altı me'mûr olan Dersaâdet çavuşlarına nezâret edecek ve maiyyetinde altı efendi olub bunları gice ve gündüz nöbetle îsâl-i muharrerât hizmetinde istihdâm edecekdir.

( Muvâsala-i Ecnebiyye Kalemi )

İşbu kalemin kezâlik bir baş me'mûru olub telgrâfhâneye verilen tahrîrâtı doğruca mahalline îsâle ve taşralardan gelen muharrerâtı ahz ile der-akab mahalline gönderilmek üzere ecnebiyye sevk kalemine i'tâya me'mûr olacak ve maiyyetinde altı muvâsala me'mûru olub bunları gice ve gündüz nöbetle îsâl-i muharrerât hizmetinde istihdâm edecekdir.

Dersaâdet telgrâfhânesinde bir kapu çuhadarı ve mektûb üzeri okuyabilecek kadar okumak bilür altı nefer mûsıl-ı muharrerât ve iki çavuş ve bir kapucı ve üç odacı istihdâm olunacak ve kapu çuhadarı idâre-i umûmiyyenin nezâretleriyle olan muâmelâtını icrâya ve muharrerât mûsılları tahrîrât-ı vârideyi mümkin olduğu kadar sür'atle sâhiblerine teslîm etmeğe ve çavuşların Dersaâdet'den Yedikule'ye kadar mevcûd olan telleri muâyene eylemeğe ve kapucı ile odacılar telgrâfhânenin hüsn-i muhâfazasiyle akşamdan sonra odaları silüb süpürerek ateş yakmağa ve ecnebîden hîç bir kimesneyi telgrâfhânede alıkoymamağa me'mûr olacakdır.