373

***

Ve kâffe-i memurînin ve çavuşânın derecât-ı memuriyetlerine göre bi'l-irâde-i seniyye mukarrer olan elbise-i mahsûsalarını iktisâ etmelerine dikkat olunacaktır.

On üçüncü madde — Telgraf müfettişliğinde bulunan zevât fünûn-ı telgrafiyenin nazariyât ve ameleyatında ibraz-ı meharet etmiş memurîninden olmaları şerâit-i muazzamadan bulunduğu cihetle müfettiş efendilerden me'mûl ve muntazar olduğu ve vezâif-i memuriyetinden bulunduğu üzere dâhil-i dâire-i memuriyetleri olan hutûtun matlûb vechle icrâ-yı muâmelât eylemesi emrinde müstahdem bulunan kâffe-i müdirân ve memurîn ve çavuşânın memuriyetlerine göre müesses olan nizâmâtın tamâmî-i icrâsına nezâretle cümlesinin vezâif-i muayyenelerini îfâ ederek hilâf-ı rızâ bir gûna hâl ve hareket vukûa getirilmeyip matlûb ve mültezem-i aslî olan emr-i muhâberât-ı telgrafiye kadiye-i mu'tenâsının devâm ve hüsn-i icrâsında lâzım gelen her dürlü esbâbın istihsâli uhde-i dirâyet ve ehliyetlerine muhavvel olup maamâfih müfettişler îfâ-yı vezâiflerinde ihtiyâr-ı tekâsül ederek servisin mugâyir-i rızâ bir hâlde kalmasına sebeb verdikleri tahakkuk ve müsbet olduğu hâlde evvel emirde ol mahallin müfettişi tenbîh ve ihtâr olunup ikinci defasında bir aylığının kat'ıyla mazhar-ı mücâzât olacağı ve üçüncü defasında müfettişlikten azl ile nihâyet üç senede birinci sınıf müdürlüğüne nâil olmaklık şartıyla işbu cünha-i muhakkakasından dolayı ikinci sınıf müdür ve şef de istasyonluğu derecesine tenzîl olunacaktır.