382

(Dersaadet Emniyet Sandığı tarafından elviye mal sandıkları üzerine keşide olunacak poliçelere dair nizamnamedir)

Birinci Madde
Asâkir-i nizâmiye ve zabtiye ve esnaf ve amele ve rençber ve hademe ve sâir her sınıf halk için memleketlerinde bulunan ayal ve evladlarına harçlık göndermeğe suhulet olmak üzere Dersaadet Emniyet Sandığı cânibinden elviye mal sandıkları üzerine yüz guruştan beş bin guruşa kadar poliçe itâ olunur.

İkinci Madde
Emniyet Sandığı cânibinden elviye mal sandıkları üzerine verilecek poliçelerin mikdarı senevî yüz bin guruşu tecavüz etmeyeceği gibi bir şahsın bir livâ mal sandığına alacağı poliçe akçesi bir senede beş bin guruştan ziyade olamayacaktır.

Üçüncü Madde
Emniyet Sandığı’ndan verilecek poliçeler âdi kâğıd üzerine yazılmayıp evrak-ı mahsûsa-i matbûaya tahrir ve poliçeyi ahz edenin isim ve şöhretiyle mahallinde bedelini istifâ edecek olanın isim ve şöhret ve memleketi ve mahall-i ikâmeti derc edilir.

Dördüncü Madde
Verilen poliçelerden Emniyet Sandığı yüz guruşta yirmi para ücret ahz eder.

Beşinci Madde
Emniyet Sandığı’na alınacak akçeler dâimî sûretde beşlik hesâbı üzerine alınıp verilecektir.

Altıncı Madde
Bir sancak mal sandığı üzerine ahz olunan poliçe mahalline vusûlünde der-akab livâ-yı mezkûr muhâsebecisine irâe olunarak ânın tarafından zahrine görüldüğü ve kabûl olunduğu işâret edilir ve bedeli üç gün sonra te’diye kılınır ve harç ve resim nâmıyla hiçbir şey ahz olunmaz hilâfında hareket eden muhâsebeciler mes’ûl tutulur.

Yedinci Madde
Poliçe bedelleri mal sandıklarından def‘aten ve nakden te’diye olunmak iktizâ edip bir gûne deyn ve havâleye mahsûb olunmaz ve müddet-i te’diyesi üç günden ziyâde uzatılmaz.

Sekizinci Madde
Elviye mal sandıkları üzerine çekilecek poliçelerin nümûnesi
[... ve poliçe ...]