383

Ve poliçelere basılacak mühür-i resmî ile sandık müdîri mühür-i zâtîsinin tatbîkleri ol emrde üzerlerine poliçe keşîde olunacak sancaklar mâl sandıklarına gönderileceğinden nümûneye muhâlif ve mühürleri mugâyir poliçe zuhûr eder ise bedeli îfâ olunmayarak red edilir.

Dokuzuncu Mâdde
Mâl sandıkları tarafından poliçelerin bedeli îfâ olundukda zahrına hâvî olduğu meblağın kabz olunduğu yazılarak zîri akçeyi ahz eden kimseye temhîr veyâ imzâ etdirilir. Akçeyi ahz eden yazı yazmak bilmediği ve mührü dahi olmadığı hâlde akçe iki kimse huzûrunda verilerek zahrına mezkûrenin zîri anlara temhîr veyâ imzâ etdirilir.

Onuncu Mâdde
Verilen poliçelerden sehv ve hatâya mebnî mâl sandıklarınca kabûl olunmayarak iâde kılınan olur ise bedeli der‘akab Emniyet Mâl Sandığı tarafından sâhibine i‘tâ ve akçe kaç gün sandıkda kalmış ise senevî yüzde dokuz hesâbiyle güzeştesi dahi îfâ kılınır.

On Birinci Mâdde
Mâl sandıkları tarafından bedeli îfâ olunan poliçeler muhâsebe cedvellerine rabt olunarak nakd makâmında Mâliye Hazîne-i Celîlesine gönderilür.

On İkinci Mâdde
Sancaklar tarafından nakd makâmında Mâliye Hazîne-i Celîlesine gönderilen poliçelerin bedeli poliçelerin görüldüğü günden i‘tibâren üç gün mürûrunda Emniyet Sandığı tarafından Hazîne-i Celîley-i mezkûreye te’diye kılınır.

On Üçüncü Mâdde
Emniyet Sandığı’ndan kangı livâ mâl sandığı üzerine ne mikdâr poliçe verilir ise bir kıt‘a cedveli beher hafta Mâliye Hazîne-i Celîlesine takdîm olunacakdır.

On Dördüncü Mâdde
Emniyet Sandığı tarafından verilen poliçelerin hesâbı mu‘âmelât-ı sâireye karışdırılmayarak ayrıca bir deftere tahrîr olunur.

Fî 16 Ca [Cemâziyelevvel] sene [12]85
Ve fî 22 Ağustos sene [12]84