389

İçün bir kâtibe muhtaç olunacağından sandıklara tayin olunacak vekiller içinde
yazı yazar ehil ve muktedir adamlar var ise bu iş onlar tarafından idare olunarak
ve yoğise haftada bir yani ayda dört gün içün icray-ı kitabet etmek
ve akçe saymak işini idare etmek üzere hariçten mutemed erbabı bulunarak
bunların ücretine karşılık olmak üzere ikraz olunacak meblağın sandığa
aid olan yüzde bir güzeştesinden maada sandıktan akçenin hin-i teslim
ve itasında yüz kuruştan bin kuruşa kadar mebaliğ içün bir defalık olarak
yüzde kırk para ve bin kuruştan on bin kuruşa kadar mebaliğ içün beher
binde beşer kuruş ve on bin kuruştan yüz bin kuruşa varıncaya kadar
beher binde yüz para kaydiye ücreti alınıp kayd memurlarına verilecektir

Dokuzuncu Madde: Her kasabada pazar ikame olunduğu günlerde memleket sandığı
vekilleri gidip ve her kazanın meclis-i idaresi veyahut meclis-i daavisi azasından
biri dahi mevcud bulunup sandığı küşad ile zirde beyan olunacak şeraite
tevfikan ödünç akçe isteyenlere karzan akçe vererek ve evvelden ikraz olunmuş
olan mebaliğden vadesi gelip sandığa getirilmiş olan akçeyi ahz
ve kabz ederek gelen akçelerin re’sü’l-malını ve güzeştesini başka başka varidat
ve ikraz olunan mebaliği masarifat defterine kayd ve tahrir ve ikrazat
içün alınan rehinleri dahi defterlerinde münderiç hanelerine işaret ve tezyil ile
pazar dağıldıktan sonra yine sandık kapanıp ve heyet-i mevcude tarafından
temhir edilip mahalline bırakılacaktır

( İkrazın Şeraiti )

Onuncu Madde: Zirde beyan olunacak şerait üzere kefaletle veyahut rehin
ile veyahut ikisi birlikte olarak memleket sandığından her kim taleb eder ise
yüzde bir faiz ile akçe ikraz olunacak ve fakat üç aydan aşağı ve bir seneden
yukarı müddetle verilmeyecektir

On Birinci Madde: Memleket sandığından her kim ödünç akçe almak ister ise
yevm-i mahsusunda sandığın açıldığı mahalle gelip ne mikdar akçe ister ise
ibtida kefil veyahut rehini kendisinden lede’s-sual kefil verecek