39

( Vâridât-ı rüsûmiye hakkında )
( Nizâmnâmedir )

Derûn-ı kazâda hâsıl olub yine ol kazâ içinde sarf olunan ve gümrüğü
olmayan kazâdan sâir gümrüğü olmayan kazâya giden eşyâdan ber-mûceb-i nizâm
gümrük alınmayarak darb-ı tamga ile kıymetinden kadîmî üzere guruşda bir pâre
tahsîl olunacakdır ve gümrüğü olan kazâya giden eşyâdan resm-i tamga mutâlebe
olunmayacakdır (3)

Tahmîshânelerde sahḳ olunan kahvenin beher kıyyesinden İstanbul tahmîshânesi
usûlüne tatbîkan yirmi beşer pâre sahḳiye ve seksen pâre ücret alınarak
ücret-i mezkûre cânib-i hazîneye ve sahḳiyesi istihdâm olunacak ameleye
bi'l-itâ hân ve hamâm ve berber dükkânlarında değirmen ve dibek ile çekirdek kahve
sarf ve sahḳ ve fürûht kılınmayacakdır ve edenler olur ise tanzîmât-ı mülkiye
usûlüne tevfîkan te'dîbât-ı lâyikaları icrâ olunacakdır (5)

Süfün-i donanma-yı hümâyûn-ı şâhâneye yarar keresteden mâadâ mîrî ormanlarından
kat' olunan kebîr keresteden onda iki ve küçük kereste ile ashâbı
uhdelerinde bulunan ormanlardan kat' olunan keresteden onda bir resm alınarak
işbu kereste resmi rızâ-yı tarafeyn olduğu takdîrde mahallî meclisi karârına
tevfîkan râyic-i belde üzere bedelen veyâhûd aynen ahz olunacakdır (7)

Sayd olunan balıkdan beşde bir resm alınıb ve işbu saydiye rüsûmu rızâ-yı tarafeyn
olduğu hâlde kezâlik mahallî meclisinin karârına tevfîkan râyic-i belde üzere bedelen
veyâhûd aynen tahsîl kılınacakdır

Öteden beri derûn-ı kazâda beyne'l-ahâlî isti'mâl olunmak üzere çârşûda
mücevherât ve evânî-i zer ve sîmin ve derûn-ı kazâda fürûht olunan at ve bârgîr
ve katır ve deve ve merkeb ve kara sığır ve mandanın kıymetlerinden guruşda bir pâre resm
alınacakdır
___________________________________
(3) Tahrîri icrâ olunan mahallerde mülgâdır
(5) Tahrîri icrâ olunan mahallerde mülgâdır
(7) Orman nizâmnâmesinin icrâ olunacağı mahallerde ahkâmı tagayyür etmişdir