396

Huruf-ı heca ile esamisi kâmilen zikr olunan esas defterinde açılacaktır
yani bir kazada beş mahalle ve kırk köy var ise evvel-emirde mahallelerin ve ba'de
köylerin topluca ismi açılmak ve fakat bulunmakda suhulet olmak içün ibtida
isimlerinin evvellerinde elif ve ba'de ba olanlar ve ba'de sırasıyla ta ve sa olanlar
ila-ahiri yazılıb ve üzerlerine numaraları vaz' olunub sermaye içün bir
ve faizden hasıl olacak para içün diğer bir kuruş hanesi ve anın
sırasına bir de numara hanesi açılarak bırakılır ondan sonra sandık
defterinin irad cihetinde ve sermaye hanesinde bir hafta zarfında kaç kalem para
gelmiş ise anları kalem kalem tarihleriyle ve teslim eden adamların mücmelen isimleriyle
işbu esas defterine nakl etmek ve faiz hanesini sıfırla geçüb anın
hizasında olan numara hanesine dahi sandık defterinin müselselen numarası
ne ise o konulmak icab eder işte para ber-vech-i muharrer esas defterine
geçirildiği anda zikr olunan kariyenin ismi üzerinde olan numara dahi
o vakit sandık defterinin ikinci hanede olan esas defteri numarası
hanesine yazılır ve bir ayda bir köyden dört def'ası da olacakla kalem kalem esas
defterine geçirilir işte bu hal ta sene ahirine kadar bu yolda cari
oldukdan sonra mah-be-mah olduğu gibi sene nihayetinde dahi sandık defterinin
varidatı toplanub muazenesi ba'de'l-icra esas defterinde dahi her köyün
sermayesi yekûn olunub icmali sandık defterinin sermaye yekûnuyla
muazene kılınır.

Yirmi Dördüncü Madde

Üçüncü numarada gösterildiği vechle ikrazata
dahi bir esas defteri tutulacaktır şöyle ki şuna buna ikraz olunan
paralar sandık defterinde masraf cihetinde mah-be-mah tafsilen yazılı olmasıyla
işte haftadan haftaya kaç kimesneye para verilmiş ise nümunesine tevfikan
her birisiçün bir hane açılmak ve anların da üzerine sırasıyla numara konulmak
lazım geldiği gibi üzerlerinde olan numaralar o vakit sandık defteri
masraf cihetinin ikinci hanede olan esas defteri numarası hanesine
yazılmak ve sandık defterinin numarası da işbu açılan hane kuruşunun
hizasında göstermek icab eder.

(Yirmi)