398

Masârifâtına ne kadar para sarf olunur ise hafta be-hafta sandık defterinin masraf cihetinden kalem be-kalem numaralarıyla hânelerine geçirilmek iktizâ eder ve bu makûle masraflar dahi ay be-ay muvâzene olunduğu gibi yıl başında dahi yekûn ve muvâzene olunur ve yirminci mâddede muharrer olduğu üzere sandığın sarfına me'zûn olduğu masârifâtı işte o esâs ve ma'lûmât üzerine yıl başında evvel emirde fâiz-i temettuundan tenzîl kılınır.

Yirmi sekizinci mâdde: İşte memleket sandığının hesâbı bu yolda tutulduğu hâlde her vakit istenür ise sandık defterine mürâcaat olundukda bir sene zarfında sandığa sermâye olarak ne kadar para gelmiş ve sermâyeden ikrâz olunup da muahharen iâde kılınan paralardan ne hâsıl olmuş ve ne kadar fâiz-i temettü'ü vukû bulmuş ise derhâl ma'lûm olacağı misillü masraf cihetine dahi nazar olundukda o müddetde ne kadar para ikrâz olunmuş ve ne kadar şey sarf kılınmış ise görüleceğinden ve vâridât yekûnundan masârifât tenzîl olundukda mevcûd-ı sandık olmak lâzım gelen para o anda meşhûd olacağından ve işbu sandıklar lâzım gelenler tarafından bagteten teftîş olundukda şunu yazmamış idim falanı kayd edecek idim yollu i'tizârât kabûl olunmayarak me'mûru mes'ûl tutulacağından şuraları hamiyet ve istikâmetin îcâbına tevfîk olunmalıdır.

Yirmi dokuzuncu mâdde: Sandığın vâridât ve sarfiyât ve kusûr-ı mevcûdu defterimiz görüle mütebeyyin olacağı gibi her köyün gerek sermâye ve gerek fâiz-i temettuundan ne kadar parası olduğu sermâye esâs defterine mürâcaat olundukda ve fâiz-i temettuundan olarak zikrolunan sandığın masârifâtıyla köylülere verilenlerin mikdârı ve müstakrizlerin isim ve kefîl ve mevâdd-ı sâiresi ikrâz esâs defterine bakıldıkda ma'lûm olacağından bunun dahi teftîş me'mûrları taraflarından vukû bulacak es'ileye cevâb verilecek yolda dikkatlice tutulması ve silinmiş ve hakk edilmiş olmaması ihtâr kılınır.

Fî 23 Rebîülevvel sene 1284

Kûşe