406

Ta‘yîn ve kat‘ ve naklleri ta‘lîmât-ı mahsûsası ahkâmına tevfîk olunacakdır.

On Üçüncü Madde: Beher sene her karyenin muhtarı ol karye ahâlisinin mîrî ormanında ra‘y etdirmek isteyecekleri hayvanâtın cins ve mikdârını mübeyyin orman me’mûrlarına bir defter verecekdir.

On Dördüncü Madde: On üçüncü madde mûcibince muhtârân tarafından verilecek defterleri orman me’mûrları ba‘de’l-mütâla‘a hayvanâtın ormanda duracakları mevsim ve müddeti ve sûret-i ra‘ylerini tahdîd ve ta‘yîn edeceklerdir.

On Beşinci Madde: Hayvanâtın esnâ-yı ra‘yde gösterilen hudûdu tecâvüz etmemeleriçün her karyenin hayvanâtına ol karye tarafından mahsûs bir çoban ta‘yîn olunacakdır.

On Altıncı Madde: Hâricden gelen ve tüccâr malı olan hayvanât sürülerinin ashâbı hayvanlarını bir mîrî ormanında tevkîf ve ra‘y etdirmek murâd eylediklerinde orman me’mûrları tarafından ruhsat istihsâl etmeleri iktizâ edecek ve o misillü sürülerin tevakkuf edeceği mahaller me’mûrlar tarafından ta‘yîn ve irâe edilip bunlardan nizâmât ve muâmelât-ı sâbıkasına tevfîkan resim alınacakdır.

On Yedinci Madde: Kurâ ahâlisi kendü arâzîsi dâhilinde vâki‘ mîrî ormanlarından tabî‘atle yıkılıp yer üzerinde kalmış olan ağaçları orman me’mûrlarının izniyle hiç bir gûne resim i‘tâ etmeksizin toplayabileceklerdir.

On Sekizinci Madde: Mîrî ormanlarından bilâ-ruhsat taş ve toprak ve tâze ve kuru yaprak ve ma‘deniyât ve bunlara mümâsil şeylerin ahz ve ihrâcı memnû‘dur. Bu bâbda alınacak ruhsatın müstenid olacağı muâmelât ta‘lîmât-ı mahsûsası hükmüne tatbîk olunacakdır.

[ Kısım ]