418

Uhdesinde olan ormandan Tersane ve Tophane idarelerinin talebiyle iktiza eden ağaçların kat’ına ve tayin olunan mahalle nakline mecbur olacak ve bu vazifenin icrası zımnında mevad-ı âtiye ahkâmına riayet eyleyecektir.

On beşinci madde: Tersane ve Tophane idareleri vakıf veyahut şahıs malı olan ormanlardan ağaç kat’ına mecbur olduklarında idare ve orman memurları hazır olduğu halde eğer kat’ olunacak ağaçlar bir vakfa merbut ormandan alınacak ise ol vakfın mütevelli veya memuru ve şahıs uhdesinde bulunan korudan kat’ edilecek ise sahibi celb edilerek istenilen kerestenin ormandaki değerine göre esmanı kararlaştırılıp orman idaresi tarafından ita ile Tersane veyahut Tophane idarelerinin tayin ve talep edecekleri mahal veya iskeleye nakl ettirilecektir.

On altıncı madde: Madde-i sabıka mucibince kat’i fiyat hususunda ittifak ve terâzî hasıl olamaz ise hükümet-i mahalliye tarafından ehl-i hibre marifetiyle ağaçların kıymeti tahdit olunacak ve işbu kıymet gerek orman idaresi ve gerek kesilecek kerestenin mensup olduğu vakıf veya sahibi nezdinde kabul olunmak lazım gelecektir.

On yedinci madde: Vakıf ve şahıs ormanlarından ağaç kat’ı ve esmanının tayini hususunda işbu nizamnamenin mirî ormanlarına müteallik olan mevadında ittihazı gösterilen usule tevfikan zabıt ceridesi ve defterler tanzim ve tertip olunacak ve damga ve numro vaz’ı gibi muamelat dahi mer’iyyü’l-icra tutulacaktır.

( Suret-i Buyuruldu )

İşbu nizamnamenin icra-yı ahkâmına irade-i seniyye-i hazret-i padişahî müteallik ve şeref-sudur buyurulmuş olmağla mucibince ifa-yı muktezasını Maliye Nezaret-i Celilesi canibinden himmet buyurulmak.

Fî 11 Şevval sene 1286
Ve fî 1 Kânûn-ı Sânî sene 1285

Posta