441

( Sûret-i Hatt-ı Hümâyûn )
( Mûcibince amel oluna )

( Sâbit Vapur Makinelerine Mahsûs Nizâmnâmedir )
( Birinci Fasıl )

( Mevlidü'l-buhârların sûret-i vaz‘ları beyânındadır )

Birinci Mâdde: Mevlidü'l-buhârlar ya‘ni vapur kazanları kuvvetlerine göre üç sınıfa münkasım olup vaz‘ ve inşâları husûslarında zîrde muharrer kavâide riâyet olunmak îcâb eder. Ve mevlidü'l-buhârların kuvveti âdi tazyîk-i havâ vâhid farz olunarak kazanın ve galeyân borularının mecmû‘u kaç arşın mik‘âb ise kazanın işlediği tazyîk-i havâ adedine darb olundukda hâsıl-ı darbden ibâretdir.

İkinci Mâdde: Hâsıl-ı darb-ı mezkûr ya‘ni kuvvet kırk adedi tecâvüz eder ise mevlidü'l-buhâr sınıf-ı evvelden add olunarak gerek işlenilen ve gerek iskân olunan ebniye içinde olamayup bunların hâricinde olarak mahal-i mahsûsuna vaz‘ olunacaktır. Sınıf-ı sânî kuvveti on ile kırk adedi beyninde olan mevlidü'l-buhârlar olup bunların yalnız destgâh ebniyesi derûnuna vaz‘ı câiz olur ise de derûnuna böyle vapur kazanı vaz‘ olunan destgâh ebniyesi âdetâ bir hâne ve süknâ ve yâhud bir kaç kat binâdan ibâret bir fabrika olamayup sâde ve hafîf ebniye olacaktır. Sınıf-ı sâlis dahi kuvvetleri on adedden az olan kazanlar olup her nev‘ destgâh ebniyesi içine vaz‘ olunabileceğinden başka âdetâ bir hâne derûnuna bile vaz‘ olunabilir.

Üçüncü Mâdde: Her bir mevlidü'l-buhâr ile etrâfında bulunan hâneler yâhud tarîk-i âm beynlerinde mevlidü'l-buhârın lâ-akal sülüs kuvvetine müsâvî mesâfe olmak ya‘ni mevlidü'l-buhârın sülüs kuvveti kaç aded ise o kadar arşın bulunmak lâzımdır. Ve mümkün olamadığı takdîrce lâ-akal bir arşın kalınlığında muhâfaza duvârı tesmiye olunur bir duvâr inşâ olunacaktır. Ve bu duvârın irtifâ‘ı dahi mevlidü'l-buhârın nihâyet-i sath-ı fevkânîsinin en yüksek mahallini mezkûr duvârdan kazanın merkezine olan bu‘d-i mesâfenin lâ-akal nısfı kadar tecâvüz edecek ve mezkûr vapur ile mevlidü'l-buhârın...